"ინიესტას გოლი მუდამ ემახსოვრება ყველა ესპანელს" - რეალის ოფიციალური განცხადება

მადრიდის რეალმა ოფიციალური განცხადება გამოაქვეყნა.

"მას შემდეგ, რაც ანდრეს ინიესტამ გამოაცხადა თავისი პროფესიონალური საფეხბურთო კარიერის დასრულების შესახებ, რეალ მადრიდს, მის პრეზიდენტსა და დირექტორთა საბჭოს სურს, რომ გამოხატოს აღიარება, დაფასება და პატივისცემა ესპანური და მსოფლიო ფეხბურთის ერთ-ერთი დიდებული ლეგენდის მიმართ.

გარდა კარიერაში მოგებული უამრავი ტიტულისა, ანდრეს ინიესტამ თავი თავისი ფეხბურთითა და ღირებულებებით დაგვამახსოვრა. მისი გოლი სამხრეთ აფრიკაში 2010 წლის მსოფლიო ჩემპიონატის ფინალში სამუდამოდ დარჩება ყველა ესპანელი გულშემატკივრის მეხსიერებაში.

რეალ მადრიდი უსურვებს მას და მის ოჯახს წარმატებებს ცხოვრების ახალ ეტაპზე." - წერია სამეფო კლუბის ოფიციალურ განცხადებაში.

ანდრეს ინიესტამ კარიერის დასრულების გადაწყვეტილება 40 წლის ასაკში მიიღო.