იტალიის ნაკრებში ოჯახური დინასტია გრძელდება

იტალიის ნაკრებში ისტორიული ფაქტი ფიქსირდება. ლუჩიანო სპალეტიმ ოქტომბრის მატჩებისთვის შემტევი დანიელ მალდინი პირველად გამოიძახა.

დანიელი არის მალდინების ოჯახის მე-3 თაობა, რომელიც სკუადრა აძურაში გამოიძახეს.

მისმა ბაბუამ ჩეზარე მალდინიმ 1960-63 წლებში ეროვნულ გუნდში 14 მატჩი ჩაატარა, 1996-98 წლებში კი იტალიის ნაკრებსაც წვრთნიდა.

დანიელის მამა ლეგენდარული პაოლო მალდინია, რომელიც ეროვნული ნაკრების წევრი 1988-დან 2002 წლამდე იყო და ამ პერიოდში 126 მატჩში მიიღო მონაწილეობა და 7 გოლიც გაიტანა.

დანიელ მალდინი მილანის აღზრდილია და როსონერის მთავარ გუნდშიც უთამაშია, ის იჯარით სპეციაში, ემპოლისა და მონცაშიც ასპარეზობდა. გასულ ზაფხულში კი ის მონცას სრულფასოვანი წევრი გახდა, ახლა კი მან ლუჩიანო სპალეტისგან იტალიის ნაკრებში გამოძახება დაიმსახურა.

დანიელს სერია ა-ს მიმდინარე სეზონში ჩატარებულ 7 მატჩში 1 გოლი აქვს გატანილი. მას სკუადრა აძურას 18, 19 და 20-წლამდელთა გუნდებშიც უთამაშია.