მანჩესტერ იუნაიტედი ამ ზაფხულს მილანის შემტევის, რაფაელ ლეაოს გაფორმებით არის დაინტერესებული.
იუნაიტედს მომავალი სეზონისთვის შეტევის ხაზის გაძლიერება სურს და პორტუგალიელი ფორვარდის ოლდ ტრაფორდზე გადაყვანას განიხილავს. ლეაოს სატრანსფერო ფასი, შესაძლოა, დაახლოებით 60 მილიონი იყოს, თუმცა მანჩესტერი ერთადერთი არ არის, ვინც 26 წლის ფეხბურთელით ინტერესდება. მის პროგრესს ლივერპული, მანჩესტერ სიტი და რეალიც აკვირდებიან.
უნივერსალური შემტევი ევროპის ერთ-ერთ საუკეთესო ვინგერად ითვლება. მილანში გატარებული ბოლო შვიდი სეზონის განმავლობაში მის ანგარიშზე 80 გოლი და 65 საგოლე გადაცემაა. მანჩესტერ იუნაიტედისთვის მისი ხარისხი და მრავალმხრივობა ძალიან სასარგებლო იქნება, რადგან ლეაოს როგორც მარცხენა ფლანგზე, ისე ცენტრალურ თავდამსხმელად შეუძლია თამაში.
ლეაოს სისწრაფე, პასი და დრიბლინგი სწორედ ის თვისებებია, რაც წითელ ეშმაკებს შეტევაში სჭირდებათ. მანჩესტერ იუნაიტედი და სხვა მსურველები ცდილობენ ტრანსფერი მსოფლიო ჩემპიონატის დაწყებამდე დაასრულონ, რადგან მილანმა, შესაძლოა, ფასი გაზარდოს, თუ ფეხბურთელი ტურნირზე თავს გამოიჩენს.
მოსალოდნელია, რომ მომდევნო კვირებში წითელ ეშმაკებს კიდევ ბევრ შემტევს დაუკავშირებენ. ჯეისონ უილკოქსი და კრისტოფერ ვიველი იმედოვნებენ, რომ ამ პოზიციაზე იდეალურ კანდიდატს შეარჩევენ. ამასთანავე, კლუბს დაცვის გაძლიერებაც სურს და მათ რადარზე ტოტენჰემის მცველი, მიკი ვან დე ვენიც მოხვდა.
