კაბო ვერდეს ნაკრების კაპიტანი რაიან მენდეში გაუპატიურების საქმეზე გამოძიების ქვეშაა.
ამ დროისთვის 36 წლის მოთამაშის წინააღმდეგ ოფიციალური ბრალი წარდგენილი არ არის, თუმცა ის ახალ ზელანდიაში მიმდინარე გამოძიების საგანია.
საქმე ბრაზილიელი ქალის საჩივარს უკავშირდება, რომელიც 2026 წლის მარტში ოკლენდში კაბო ვერდეს ნაკრების თარჯიმნად იყო დაქირავებული.
მტკიცებულებად ქალმა წარადგინა კლინიკის სამედიცინო დასკვნები, ასევე ფოტოები იმ დაზიანებებისა, რომლებიც, მისი თქმით, თავდასხმის შედეგად მიიღო.
გავრცელებული ინფორმაციით, ინციდენტი 27 მარტს მოხდა, როდესაც კაბო ვერდეს ნაკრები ოკლენდში FIFA Series-ის ტურნირზე იმყოფებოდა.
ქალი, ბრაზილიის მოქალაქე, რომელიც ახალ ზელანდიაში ცხოვრობს, ადგილობრივმა ფედერაციამ კაბო ვერდეს დელეგაციის თარჯიმნად და ოპერაციულ კოორდინატორად დაიქირავა. იგი იმავე სასტუმროში ცხოვრობდა, სადაც ნაკრები იყო დაბინავებული.
მისი საჩივრის თანახმად, ჩილესთან მარცხის შემდეგ შეხვედრაზე მიიწვიეს, რადგან ეგონა, რომ სამუშაო საკითხებზე უნდა ემუშავა.
თუმცა, როდესაც გაირკვა, რომ ეს მხოლოდ გუნდის არაფორმალური შეკრება იყო, საკუთარ ნომერში დაბრუნდა.
მისი თქმით, ცოტა ხანში კარზე დააკაკუნეს და სწორედ ამ დროს შევიდა ოთახში რაიან მენდეში, რომელმაც, ქალის ვერსიით, მასზე იძალადა და გააუპატიურა.
ბუნებრივია, ეს ბრალდებები ჯერ არ არის დადასტურებული. თუმცა ქალმა იმ პერიოდში გადაიღო ფოტოები დაზიანებებისა, რომლებიც, მისი თქმით, თავდასხმის შედეგად მიიღო - ჭრილობები ტუჩზე, ასევე სისხლჩაქცევები კისერზე, თეძოზე და ფეხებზე - და ისინი პოლიციას გადასცა.
მან ასევე მიმართა სპეციალიზებულ კლინიკას, რომელიც სექსუალური ძალადობის მსხვერპლებს ეხმარება.
იქ ჩაუტარდა სამედიცინო და ექსპერტიზის პროცედურები, ასევე მიიღო ფსიქოლოგიური დახმარება.
Globo Esporte-ის მიერ გამოქვეყნებული სამედიცინო დასკვნის მიხედვით, დაფიქსირდა სისხლჩაქცევები კისერზე, მკერდსა და ტუჩებზე, ასევე გენიტალური დაზიანებები, რომლებიც ქალის მონათხრობთან შესაბამისობაშია.
ახალი ზელანდიის პოლიციამ დაადასტურა, რომ გამოძიება მიმდინარეობს, თუმცა ქვეყნის მკაცრი კონფიდენციალურობის კანონების გამო კონკრეტული პირების ვინაობას არ ასახელებს.
სამართალდამცავებმა ასევე მოიპოვეს სასტუმროს სათვალთვალო კამერების ჩანაწერები.
ამჟამად ელოდებიან ექსპერტიზის საბოლოო შედეგებს, რის შემდეგაც გადაწყდება, წარედგინება თუ არა ვინმეს ბრალი. პროცესი შესაძლოა რამდენიმე თვე გაგრძელდეს.
ამავდროულად, ქალმა და მისმა მეუღლემ ოფიციალური საჩივარი გაუგზავნეს როგორც FIFA-ს, ისე კაბო ვერდეს ფეხბურთის ფედერაციას და მოითხოვეს, რომ მენდეში მსოფლიო ჩემპიონატიდან მოეხსნათ.
თუ გამოძიების დასრულების შემდეგ პოლიცია მიიჩნევს, რომ მტკიცებულებები საკმარისია, საქმე ახალ ზელანდიის სასამართლოში გადავა.
იქ სექსუალური ძალადობისთვის გამამტყუნებელი განაჩენი მაქსიმუმ 20 წლამდე თავისუფლების აღკვეთას ითვალისწინებს.
