ESPN Argentina-ს ინფორმაციით, კარლოს ტევესის გამოსამშვიდობებელი მატჩი 2026 წლის 19 დეკემბერს ლა ბომბონერაზე გაიმართება.
ეს ისტორიული საღამო იქნება არა მხოლოდ იმიტომ, რომ ლეგენდარული „ელ აპაჩე“ ფეხბურთს დაემშვიდობება, არამედ იმიტომაც, რომ ამ მატჩმა შესაძლოა ლიონელ მესი და კრიშტიანუ რონალდუ გააერთიანოს.
შეგახსენებთ, გასულ წელს, როდესაც კარლიტოსი თავის გამოსამშვიდობებელ მატჩზე საუბრობდა, განაცხადა, რომ კრიშტიანუ რონალდუსა (რომელთან ერთადაც მანჩესტერ იუნაიტედში თამაშობდა) და ლიონელ მესის (რომელთან ერთადაც მრავალი წელი არგენტინის ნაკრებში გაატარა) მიწვევას აპირებდა.
იმავე ინტერვიუში ბოკა ხუნიორსის აღზრდილმა აღნიშნა, რომ თავად იზრუნებდა მესისა და რონალდუს ერთ მატჩში გაერთიანებაზე.
„გამოსამშვიდობებელი მატჩი? დიახ, გავმართავ. აუცილებლად გავაკეთებ ამას.
კრიშტიანუ და მესი? მათ გავაერთიანებთ, აუცილებლად გავაერთიანებთ. კრიშტიანუს მოსაყვანად პირადად მე წავალ. საქმე ისე კი არ იქნება, რომ უბრალოდ თვითონ ჩამოვა, მე პირადად წავალ მის მოსაყვანად.“ - განაცხადა ტევესმა Gol Gana-სთან.
