მადრიდის რეალის მთავარი მწვრთნელი, ჟოზე მოურინიო არ მიიჩნევს, რომ კლუბისთვის ჩემპიონთა ლიგის ტიტული მართებს.
პორტუგალიელი სამეფო კლუბს 2010-იდან 2013 წლამდე წვრთნიდა და სამი ტიტული მოიგო - ესპანეთის ჩემპიონატი, თასი და სუპერთასი, ხოლო ჩემპიონთა ლიგაზე გუნდი ნახევარფინალამდე მიდიოდა. ამ ზაფხულს ჟოზე მადრიდში დაბრუნდა.
8 სექტემბერს რეალი ჩემპიონთა ლიგის 2026/27 წლების სეზონის პირველ ტურში ინტერს უმასპინძლებს. ჟურნალისტის შეკითხვაზე, გრძნობს თუ არა, რომ კლუბისთვის ჩემპიონთა ლიგის ვალი აქვს, პორტუგალიელმა უპასუხა:
„არა. მადრიდში ორი განსხვავებული პერიოდი მაქვს, პირველი 2013 წელს დასრულდა. მოვიგეთ ის, რაც მოვიგეთ და წავაგეთ ის, რაც წავაგეთ. ყველაფერი გავეცით, მაგრამ ის თავი დახურულია. წარსულთან კავშირი არ არსებობს - ეს უბრალოდ ორი სხვადასხვა პერიოდია რეალის ისტორიაში.
2010 წლისთვის წლების განმავლობაში მეოთხედფინალსაც ვერ აღწევდნენ. ახლა კი ეს არის რეალი, რომელმაც ბოლო წლებში არ ვიცი რამდენი ლიგა მოიგო - ექვსი, შვიდი თუ რვა? ეს ორი სხვადასხვა პერიოდია, თუმცა ეს ჩემს აზროვნებას არ ცვლის.
რომ მკითხოთ, ვიქნებოდი თუ არა ბედნიერი რეალთან ერთად ჩემპიონთა ლიგის მოგებით - რა თქმა უნდა, დიახ! რა თქმა უნდა! თუმცა ეს აბსოლუტურად არ უკავშირდება იმას, რომ ეს ადრე ვერ შევძელი“, - განაცხადა მოურინიომ.
