ნახეთ, ჩვენმა ნაკრებმა რა დაუნდობლად გაანადგურა მეტოქე მსოფლიო ჩემპიონატზე

ხორვატიის დედაქალაქ ზაგრებში მიმდინარე წყალბურთის 16-წლამდელთა მსოფლიო ჩემპიონატზე, საქართველოს ნაკრებმა ბოლოადგილოსანი ურუგვაი დიდი ანგარიშით დაამარცხა - 21:5.

მასპინძელ ხორვატიასთან (4:20) და სერბეთთან (2:15) გამანადგურებელი სხვაობით წაგებებისა და პორტუგალიასთან (7:4) გამარჯვების შემდეგ, ჩვენს გუნდს სამხრეთ ამერიკულ სუსტ ნაკრებთან მოგება მართებდა და ეს მისია შეასრულა კიდეც. ჩვენთან თამაშამდე, ურუგვაელები გერმანიასთან - 1:19, ეგვიპტესთან - 4:21, ხოლო ყაზახეთთან 5:22 დამარცხდნენ.

მატჩის საუკეთესო მოთამაშედ დაასახელეს გიორგი სურმავა, რომელმაც სამხრეთ ამერიკელებს 7 გოლი გაუტანა, ანდრია ცირდავამ 5 გოლი შეაგდო, კაპიტანმა საბა აბულაძემ 4 გოლით გამოიჩინა თავი, ლექსო პეტაშვილმა და ანდრია ღარიბაშვილმა 2-2 გოლი გაიტანეს, ხოლო გიორგი მარხვაშვილმა - 1.

შედეგად, 4 ტურის შემდეგ, მარკო ბალდინეტის გაწვრთნილ გუნდს 2-2 მოგება-წაგება აქვს და ჯგუფური ეტაპი მე-19 ადგილზე დაასრულა, რაც ნიშნავს, რომ მე-17 ადგილისთვის საბრძოლველ პლეი-ოფში გადაინაცვლა.

7 აგვისტოს, ჩვენი ნაკრები მე-17 ადგილისთვის ბრძოლას იწყებს ყაზახეთთან (ჯგუფურ ეტაპზე 22-ე) მატჩით და მსოფლიო ჩემპიონატზე აღნიშნული პოზიციის დასაკავებლად, ყაზახების გარდა, კიდევ ორი მეტოქის დამარცხება დასჭირდება.

თუკი საქართველო ყაზახეთს დაამარცხებს, სინგაპურს (ჯგუფში მე-18) ან კანადას (23-ე) შეხვდება. მეორე ოთხეულიდან კი მე-17 ადგილისთვის ნიდერლანდები (მე-20), პოლონეთი (21-ე), მონტენეგრო (მე-17) და პერუ (24-ე) იბრძვიან - მე-17 ადგილის ფინალში ამ 4-დან ერთ-ერთი გავა და, იმედია, მისი მეტოქე საქართველოს ნაკრები იქნება.

საქართველოს უმძიმესი მარცხი მსოფლიო ჩემპიონატზე