ნეიმარი მოედანზე ბრუნდება

ბრაზილიის ნაკრებმა მსოფლიო ჩემპიონატზე ძალა დაიბრუნა - გუნდის ლიდერმა და კაპიტანმა, ნეიმარმა ტრავმა მოიშუშა და ვარჯიშს დაუბრუნდა.

წვივზე არსებული პრობლემის გამო მან მუნდიალის სასტარტო ორი შეხვედრა გამოტოვა, ახლა კი ინტენსიურად ემზადება ჯგუფური ეტაპის დასკვნითი, შოტლანდიასთან მატჩისთვის.

რეაბილიტაცია ნიუ-ჯერსიში და ანჩელოტის დასტური

34 წლის ფეხბურთელი შაბათს ნიუ-ჯერსის ბაზაზე ბურთით ვარჯიშისას შეამჩნიეს. სანამ ნაკრების ძირითადი ბირთვი ჰაიტისთან მატჩის შემდეგ აღდგენით პროცესს დარბაზში გადიოდა, ნეიმარი მოედანზე ალექს სანდროსთან ერთად მუშაობდა. თავდაპირველი პროგნოზით, კუნთის მეორე ხარისხის დაჭიმულობის მკურნალობას სამი კვირა სჭირდებოდა, თუმცა რეაბილიტაციამ მოლოდინზე სწრაფად ჩაიარა.

ჰაიტისთან გამარჯვების შემდეგ, კარლო ანჩელოტიმ პრესკონფერენციაზე ნანატრი ინფორმაცია დაადასტურა:

ნეიმარი კვირას ინდივიდუალურად ივარჯიშებს, ორშაბათიდან კი გუნდს სრულად შეუერთდება. ის შოტლანდიასთან მატჩისთვის მზად იქნება

სელესაომ რიტმი იპოვა

მაროკოსთან ჩავარდნილი სასტარტო ფრეს (1:1) შემდეგ, ბრაზილიამ ჰაიტი 3:0 გაანადგურა - მატეუს კუნიას დუბლითა და ვინისიუს ჟუნიორის მორიგი ბრწყინვალე თამაშით გუნდმა ძველი თავდაჯერება დაიბრუნა. ამჟამად ბრაზილიელებს 4 ქულა აქვთ და 1/16-ფინალში გასასვლელად შოტლანდიასთან ფრეც აწყობთ.

ნეიმარის დაბრუნება მაიამიში გასამართი მატჩის წინ გუნდისთვის უდიდესი ფსიქოლოგიური და ტაქტიკური სტიმულია, რაც ანჩელოტის პლეი-ოფის წინ სრული ძალების მობილიზების საშუალებას მისცემს.