ოლდ ტრაფორდის ახალი გმირი - დიალომ 10 წუთში ჰეთ-ტრიკი შეასრულა და მანჩესტერს მოაგებინა

პრემიერ ლიგის 21-ე ტურის მატჩში მანჩესტერ იუნაიტედმა საუთჰემპტონი დაამარცხა.

შეხვედრა ოლდ ტრაფორდზე გაიმართა და მასპინძელთა გამარჯვებით 3:1 დასრულდა.

43-ე წუთიდან უგარტეს ავტოგოლით საუთჰემპტონი 82-მდე იგებდა და თითქოს, მანჩესტერი კიდევ ერთ აუთსაიდერთან ქულების დაკარგვასთან იყო ახლოს, თუმცა შემდეგ ავანს-სცენაზე ამად დიალო ავიდა.

ახალგაზრდა შემტევმა 10 წუთში 3 გოლი გაიტანა და ამორიმის გუნდს 3 უმნიშვნელოვანესი ქულა მოუტანა.

მანჩესტერმა 26 ქულა დააგროვა და მე-12 ადგილს იკავებს, საუთჰემპტონი კი მხოლოდ 6 ქულით ბოლო ადგილზეა.