ოფიციალურად: მარსელინო სეზონის ბოლოს ვილიარეალს დატოვებს

ვილიარეალი და მარსელინო გარსია ტორალი სეზონის ბოლოს ურთიერთობას დაასრულებენ.

,,ასტურიელი მწვრთნელი ამით კლუბში თავის მეორე პერიოდს დაასრულებს, ის 2023 წელს დაბრუნდა და ზედიზედ მეორედ მოიპოვა ჩემპიონთა ლიგის საგზური, რაც კლუბის ისტორიაში პირველად მოხდა.

ვილიარეალი საჯაროდ მადლობას უხდის მარსელინოსა და მის სამწვრთნელო შტაბს პროფესიონალიზმისთვის, ერთგულებისა და დაუღალავი შრომისთვის პირველი დღიდანვე, ასევე ყოველდღიური თავდადებისა და გუნდის განვითარებაში შეტანილი წვლილისთვის იმ 7 სეზონის განმავლობაში, როდესაც მან გუნდს 2 პერიოდის ფარგლებში უხელმძღვანელა (2013–2016 და 2023–2026).

ასტურიელი გახდა კლუბის ისტორიაში ყველაზე მეტი მატჩის მქონე მწვრთნელი - ყველა ტურნირში ჯამში 298 შეხვედრით და ფლობს ყველაზე მეტი გამარჯვების რეკორდსაც, 145 მოგებით.

ყვითელი გუნდის სათავეში ყოფნისას მარსელინომ მიაღწია მნიშვნელოვან წარმატებებს, როგორიცაა ვილიარეალის დაბრუნება ესპანეთის უმაღლეს დივიზიონში (2013), 5-ჯერ ევროპული ტურნირების საგზურის მოპოვება (ჩემპიონთა ლიგა და ევროპა ლიგა), მათ შორის 2016 წელს ნახევარფინალში გასვლა, ასევე 2015 წელს კოპა დელ რეის ნახევარფინალში თამაში.

ვილიარეალი მას პატივს მიაგებს ლა ლიგის ბოლო მატჩში ატლეტიკო მადრიდის წინააღმდეგ, რაც ასევე იქნება ჩემპიონთა ლიგის საგზურის აღსანიშნავი ზეიმი გულშემატკივრებთან ერთად ესტადიო დე ლა სერამიკაზე.

გულითად მადლობას გიხდით, მარსელინო. მადლობა ყველაფრისთვის, რაც ამ კლუბსა და მის გულშემატკივრებს აჩუქეთ. გისურვებთ წარმატებას მომავალ სპორტულ საქმიანობაში." - წერია კლუბის განცხადებაში.