ბრაზილიური ფლუმინენსეს დატოვების შემდეგ, ტიაგო სილვა ევროპაში დაბრუნდა.
ბრაზილიელმა მცველმა უკვე ოფიციალურად გააფორმა კონტრაქტი პორტუსთან. მხარეები მოკლევადიან ხელშეკრულებაზე შეთანხმდნენ. სილვას დამატება პორტუს პრეზიდენტის, ანდრე ვილაშ-ბოაშის დიდი სურვილი იყო.
41 წლის მცველმა პორტუგალიურ კლუბთან კონტრაქტი 2026 წლის ივნისამდე გააფორმა, 2027 წლამდე გახანგრძლივების პერსპექტივით.
ტიაგო სილვა 2004 წელს თავის ევროპულ კარიერას სწორედ პორტუს B გუნდში იწყებდა, თუმცა იქ მხოლოდ 1 წელი გაატარა. 21-წლიანი პაუზის შემდეგ კი ბრაზილიელი მცველი კვლავ პორტუგალიის ერთ-ერთ გრანდში დაბრუნდა.
ცენტრალური მცველის ბოლო ევროპული კლუბი ჩელსი იყო, სადაც 2020-24 წლებში ასპარეზობდა და ლონდონურ გუნდთან ერთად ჩემპიონთა ლიგის გამარჯვებულიც გახდა. ბოლოს კი სილვა ფლუმინენსეში თამაშობდა, რომელიც ცოტა ხნის წინ თავისუფალი აგენტის სტატუსით დატოვა.
