ჰანს ფლიკმა, ბარსელონას მთავარმა მწვრთნელმა, ჩემპიონთა ლიგის მეოთხედფინალის პირველი მატჩისთვის შემადგენლობაში ორი ცვლილება შეიტანა.
ბარსელონა ატლეტიკოს წინააღმდეგ კამპ ნოუზე გასამართ შეხვედრას ამაღლებული განწყობით ხვდება, რადგან გასულ შაბათს მადრიდელები მათსავე მოედანზე, ლა ლიგის ეგიდით, 2:1 დაამარცხეს.
გამოცემა Mundo Deportivo-ს ცნობით, განაცხადში მესამე მეკარის პოზიციაზე ინიაკი პენიას ნაცვლად დიეგო კოჩენი მოხვდა, ასევე გუნდს შეუერთდა მცველი ალვარო კორტესი.
მეორე მხრივ, ფრენკი დე იონგი, რაფინია, ბერნალი და კრისტენსენი შეხვედრას გამოტოვებენ. მათი არყოფნა წინასწარ იყო ცნობილი. მიუხედავად დანაკლისისა, ფლიკს კარგი არჩევანი აქვს, განსაკუთრებით ჟიულ კუნდესა და ალეხანდრო ბალდეს დაბრუნების შემდეგ.
ფრანგ მცველს, როგორც ჩანს, ადგილი გარანტირებული აქვს მარჯვენა ფლანგზე, ხოლო მარცხენა მხარეს მოსახვედრად ჟოაუ კანსელუ და ბალდე იბრძვიან. პორტუგალიელი ატლეტიკოს წინააღმდეგ ლიგაში ჩატარებული შესანიშნავი მატჩის შემდეგ კარგ ფორმაშია, ბალდე კი გერმანელი მწვრთნელის მუდმივი ნდობით სარგებლობს.
რონალდ არაუხო სრულ მზადყოფნაშია, თუმცა მისი ძირითადში დაბრუნება რთული იქნება კუნდეს კარგი ფორმისა და კუბარსი-მარტინის სტაბილური წყვილის გათვალისწინებით.
ყველაზე დიდი ბრძოლა ნახევარდაცვაშია მოსალოდნელი. შესაძლოა, ფლიკმა ერიკ გარსიას, პედრისა და ფერმინის ტრიო დააყენოს, რათა ატლეტიკოს მძლავრ ცენტრს გაუმკლავდეს, რომელსაც კოკე და მარკოს ლიორენტე მეთაურობენ (ამ უკანასკნელმა წინა მატჩი დისკვალიფიკაციის გამო გამოტოვა).
შეტევაში რობერტ ლევანდოვსკი კვლავ ლიდერი იქნება, მას კი მხარს ლამინ იამალი და მარკუს რაშფორდი დაუჭერენ. რაშფორდმა მადრიდში რაფინია შეცვალა და გოლის გატანაც მოახერხა.
