ფრანგულ ლე კლასიკში ბრძოლა არ შედგა - პსჟ-მ სტუმრად მარტივად იმარჯვა

ლიგა 1-ს მე-9 ტურში ფრანგული ლე კლასიკი შედგა - მარსელმა საკუთარ მოედანზე პარი სენ-ჟერმენს უმასპინძლა.

მოსალოდნელი ბრძოლა არ შედგა - ლუის ენრიკეს გუნდმა მეტოქე 3:0 გაანადგურა.

მე-7 წუთზე ჟოაო ნევეშმა პარიზული კლუბი დააწინაურა. 20-ზე ოლიმპიკის მდგომარეობა უკიდურესად დამძიმდა, როცა ამინე ჰარიტმა პირდაპირი წითელი ბარათი მიიღო და დე ძერბის გუნდი კაცნაკლული დატოვა.

რიცხობრივი უპირატესობით პსჟ-მ მალევე ისარგებლა და ჯერ ბალერის ავტოგოლით სხვაობა ორამდე გაზარდა, ტაიმის მიწურულს კი ბარკოლამ ანგარიში გამანადგურებელი გახადა.

მეორე ნახევარში გოლი აღარ გასულა და პსჟ-მ საქმე მშვიდ გამარჯვებამდე მიიყვანა, რის ხარჯზეც 23 ქულა დააგროვა და ცხრილს ერთპიროვნულად ჩაუდგა სათავეში. უახლოეს მდევარ მონაკოს 3 ქულით ნაკლები აქვს, მარსელი კი 17 ქულით მე-3 ადგილს იკავებს.