,,პროკურატურის გადაწყვეტილება ცნობილია" - როგორ დაისაჯა ჯაკა?

შვეიცარიის ნაკრებისა და სანდერლენდის ნახევარმცველმა, გრანიტ ჯაკამ, სოციალურ ქსელში განცხადება გამოაქვეყნა.

,,რამდენიმე კვირის წინ აქ პირადად გავაკეთე განცხადება და ვთქვი, რომ ჩემს გადაწყვეტილებაზე პასუხისმგებლობას ვიღებდი. ამ სიტყვების ერთგული ვრჩები.

მას შემდეგ, რაც პროკურატურას სრულყოფილი ჩვენება მივეცი, ახლა უკვე პროკურატურის გადაწყვეტილება ცნობილია.

სასამართლოს მიერ გამოტანილი საჯარიმო ბრძანების საფუძველზე, ყალბი დოკუმენტის მოტყუებით მოპოვებისთვის, 2 წლის გამოსაცდელი ვადით, 50 დღიურ განაკვეთად განსაზღვრული ფულადი ჯარიმა დამეკისრა.

თითოეული დღიური განაკვეთი 3 000 შვეიცარიულ ფრანკს შეადგენს.

ეს ნიშნავს, რომ სასჯელი არ აღსრულდება, თუ აღნიშნული პერიოდის განმავლობაში ახალ სამართალდარღვევას არ ჩავიდენ. სასამართლო პროცესთან დაკავშირებული ხარჯები უკვე გადავიხადე.

ვიღებ ამ გადაწყვეტილებას და სრულ პასუხისმგებლობას ვიღებ ჩემს ქმედებაზე.

მადლობას ვუხდი ყველას, ვინც ბოლო კვირების განმავლობაში მხარდამჭერი შეტყობინებები გამომიგზავნა. ეს ჩემთვის ძალიან ბევრს ნიშნავს." - წერს ჯაკა.

გრანიტ ჯაკას პირობითი ფულადი ჯარიმა ყალბი COVID-სერტიფიკატის გამოყენების გამო დაეკისრა. ჯარიმის ოდენობა დაახლოებით 140 000 ფუნტ სტერლინგს შეადგენს.

შვეიცარიის ნაკრების მთავარმა მწვრთნელმა მურატ იაკინმა ცოტა ხნის წინ მკაფიოდ განაცხადა, რომ ნახევარმცველის ეროვნულ გუნდში დაბრუნება სურდა, ხოლო შვეიცარიის ფეხბურთის ასოციაციის პრეზიდენტმა პეტერ კნებელმა ყველა შესაძლო ვარიანტი ღიად დატოვა.