შესაძლო პატიმრობა - რაში ადანაშაულებენ გრანიტ ჯაკას?

არსებობს ეჭვი, რომ გრანიტ ჯაკამ COVID-სერტიფიკატი ვაქცინაციის გარეშე მიიღო.

ოქტომბრის დასაწყისში მას შვეიცარიის შესაბამისი უწყებები დაკითხავენ. ფეხბურთელს 5 წლამდე პატიმრობა ემუქრება, ამასთან, ის ერთა ლიგის მომდევნო 4 მატჩს გამოტოვებს.

გრანიტ ჯაკას წინააღმდეგ გამოძიება მიმდინარეობს. შვეიცარიული მედია Blick-ის ინფორმაციით, შვეიცარიის ნაკრების კაპიტანი ეჭვმიტანილია COVID-19-ის სერტიფიკატის ვაქცინაციის გარეშე მიღებაში.

ლუცერნის პროკურატურამ სანდერლენდის ნახევარმცველისა და ლუცერნში მომუშავე ექიმის წინააღმდეგ გამოძიება დაიწყო.

თუ ჯაკას ბრალეულობა დადასტურდება, მას სისხლისსამართლებრივი პასუხისმგებლობა შეიძლება დაეკისროს.

„დოკუმენტის გაყალბება შეიძლება დაისაჯოს ჯარიმით ან 5 წლამდე თავისუფლების აღკვეთით“, - განუცხადა Blick-ს სისხლის სამართლის სპეციალისტმა ანდრე კუნმა.

თუმცა, მისი განმარტებით, არსებობს არაერთი გარემოება, რომელმაც შესაძლოა სასჯელის შემსუბუქება ან პირობითი სასჯელის გამოყენება გამოიწვიოს.

„ადამიანს, რომელსაც წარსულში ნასამართლეობა არ ჰქონია, შეუძლია პირობით ჯარიმას ელოდოს. ამასთან, მაქსიმალური ჯარიმა 10 000 შვეიცარიულ ფრანკს (დაახლოებით 10 580 ევროს) შეადგენს.“

შვეიცარიის ნაკრების ფეხბურთელი, რომელსაც ეროვნულ გუნდში 152 მატჩი აქვს ჩატარებული, ოქტომბრის დასაწყისში სასამართლოში უნდა გამოცხადდეს.

2026 წლის მსოფლიო ჩემპიონატზე შვეიცარიის ნაკრების კაპიტანი ჯაკა ერთა ლიგის მომდევნო 4 შეხვედრას გამოტოვებს. მან აღიარა, რომ წარსულში ყალბი COVID-სერტიფიკატი გამოიყენა.

„იმ პერიოდში COVID-19-ის საწინააღმდეგო ვაქცინაციის საკითხი ჩემში დიდ შეშფოთებასა და სერიოზულ ეჭვებს იწვევდა. ვაქცინის მიმართ ღრმა უნდობლობას ვგრძნობდი და შფოთვა და ეჭვები მაწუხებდა“, - დაწერა გრანიტ ჯაკამ Instagram-ზე.

„სწორედ ასეთ რთულ ემოციურ მდგომარეობაში მივიღე ვაქცინაციის სერტიფიკატი. ეს შეცდომა იყო. ვწუხვარ“, - დაამატა მან.

„თანახმა ვარ, რომ ფაქტები სრულად იქნეს შესწავლილი და შესაბამის უწყებებთან სრულად ვთანამშრომლობ“, - აღნიშნა შვეიცარიელმა ფეხბურთელმა.

„შემდეგ ნაბიჯებს განვიხილავთ"

ამ ეტაპზე შვეიცარიის ნაკრებს თავისი კაპიტნის გარეშე მოუწევს თამაში. ეს გადაწყვეტილება ფეხბურთელსა და შვეიცარიის ფეხბურთის ასოციაციის (SFA) ხელმძღვანელობას შორის შეხვედრისას, „ორმხრივი შეთანხმებით“ მიიღეს.

„გრანიტ ჯაკამ სიტუაციის შესახებ გუშინ საღამოს შეგვატყობინა“, - განაცხადა SFA-ს პრეზიდენტმა პეტერ კნებელმა.

„მივესალმებით იმას, რომ გრანიტმა ეს ნაბიჯი გადადგა და მზად არის, ამ საქმეს სრულად მოეფინოს ნათელი. ამავდროულად, ერთობლივად მივედით დასკვნამდე, რომ გუნდის ინტერესებისთვის უკეთესი იქნება, თუ ის ამ შეკრებაში მონაწილეობას არ მიიღებს“, - აღნიშნა მან.

შვეიცარიის ნაკრები ამჟამად თურქეთის ქალაქ ბელეკში ემზადება, სადაც პარასკევამდე დარჩება. შემდეგ გუნდს ორი გასვლითი მატჩი ელის, 26 სექტემბერს ჩრდილოეთ მაკედონიასთან და 29 სექტემბერს შოტლანდიასთან.

3 და 6 ოქტომბერს შვეიცარია, ლუცერნში, შესაბამისად სლოვენიასა და ჩრდილოეთ მაკედონიას შეხვდება.

„ამ სანაკრებო ფანჯრის დასრულების შემდეგ გრანიტთან ერთად სიტუაციას კიდევ ერთხელ შევაფასებთ და შემდგომ ნაბიჯებს განვიხილავთ“, - განაცხადა პეტერ კნებელმა.

ერთა ლიგის ფარგლებში შვეიცარიის ნაკრებს ნოემბერშიც ორი მატჩი აქვს დაგეგმილი, 13 ნოემბერს სლოვენიასთან და 16 ნოემბერს შოტლანდიასთან.