სატრანსფერო ფანჯრის ბოლო საათებში მალიკ ფოფანას საგამ გულშემატკივრების ყურადღება მიიპყრო.
ლიონის გარემარბით გუშინ ანდრეა ბერტა და არსენალი დაინტერესდნენ, თუმცა ლონდონელებმა ფეხბურთელის სანაცვლოდ მოთხოვნილი 30 მილიონი ფუნტის გადახდაზე უარი თქვეს.
დღეს საქმეში სანდერლენდი ჩაერთო და ლიონთან 30 მილიონი ფუნტის ღირებულების პაკეტზე შეთანხმდა. ფოფანას ხუთწლიანი კონტრაქტი უნდა გაეფორმებინა და სამედიცინო შემოწმებაც უკვე დაგეგმილი იყო.
ამის შემდეგ კრისტალ პალასმა სანდერლენდის შეთავაზებას გადააჭარბა და 33.5 მილიონი ფუნტი შესთავაზა, ლიონმა კი ეს წინადადება მიიღო.
ფეხბურთელსა და მის წარმომადგენლებს ორი კერძო თვითმფრინავი ჰქონდათ დაჯავშნილი, ერთი ლონდონის მიმართულებით, მეორე კი ნიუკასლისკენ, რომელიც სანდერლენდთან ახლოს მდებარეობს.
თავდაპირველად ფოფანამ ინგლისის ჩრდილოეთში გამგზავრების ნაცვლად ლონდონში გაფრენა და კრისტალ პალასში ტრანსფერის დასრულება გადაწყვიტა.
ამის შემდეგ სანდერლენდმა კრისტალ პალასის შეთავაზება გაათანაბრა და ფოფანას აგენტებს უფრო მაღალი საკომისიო შესთავაზა, რასაც ფეხბურთელი და მისი წარმომადგენლები დათანხმდნენ.
კრისტალ პალასისთვის ფეხბურთელის ადგილსამყოფელი გაურკვეველი გახდა, რადგან ფოფანა ლიონიდან ჩრდილო-აღმოსავლეთ ინგლისის მიმართულებით გაფრინდა, რათა ტრანსფერი დაესრულებინა.
საბოლოოდ, ფოფანა სანდერლენდს 33.5 მილიონი ფუნტის ღირებულების საერთო პაკეტით შეუერთდება, ხოლო მისი აგენტები სოლიდურ საკომისიოს მიიღებენ.
აღნიშნულ ცნობებს დღის განმავლობაში ფაბრიციო რომანო, დევიდ ორნშტეინი და სხვა სანდო წყაროები ავრცელებდნენ.
თუმცა ამ ყველაფრის შემდეგ, სანამ 21 წლის ბელგიელი ფეხბურთელის ტრანსფერს რომელიმე კლუბი ოფიციალურად არ დაადასტურებს, გადაჭრით რაიმეს თქმა რთულია.
