პროკურატურის მკაცრი პასუხი რასიზმზე

პროკურატურა რაშფორდის რასისტული შეურაცხყოფისთვის პატიმრობასა და მკაცრ სანქციებს ითხოვს

ასტურიის პროკურატურამ საკმაოდ მკაცრი პოზიცია დაიკავა იმ ახალგაზრდის მიმართ, რომელმაც გასული წლის 25 სექტემბერს, კარლოს ტარტიერეს სტადიონზე, მარკუს რაშფორდს რასისტული შეურაცხყოფა მიაყენა.

გამოძიების მასალებით ირკვევა, რომ ინციდენტი მატჩის დროს მოხდა, როდესაც 2007 წელს დაბადებულმა ბრალდებულმა კუთხურის ჩასაწოდებლად მისულ ფეხბურთელს შეურაცხმყოფელი სიტყვებით მიმართა, რითაც მისი ღირსება საჯაროდ შელახა. საქმეს განსაკუთრებული რეზონანსი იმ ფაქტმაც შესძინა, რომ მომხდარის ამსახველი ვიდეო სოციალურ ქსელებში ელვისებურად გავრცელდა და მხოლოდ ერთ დღეში 28 მილიონზე მეტი ნახვა დააგროვა, რამაც ფეხბურთელის მორალური ზიანი კიდევ უფრო გაზარდა.

პროკურატურა ბრალდებულისთვის 1 წლით და 3 თვით თავისუფლების აღკვეთას, 2 880 ევროს ოდენობით ჯარიმას და თავად რაშფორდისთვის 2 000 ევროს კომპენსაციის გადახდას ითხოვს. გარდა ამისა, მოთხოვნილია ოთხწლიანი აკრძალვა ნებისმიერ სპორტულ თუ საგანმანათლებლო საქმიანობაზე.

თუ სასამართლო პატიმრობას არ მიუსჯის, ალტერნატიული მოთხოვნა კიდევ უფრო მკაცრია: ხუთ წელზე მეტი ვადით სტადიონებზე შესვლის სრული აკრძალვა, რაც ლა ლიგის, UEFA-სა და FIFA-ს ეგიდით გამართულ ყველა მატჩს შეეხება.