საფრანგეთის ლიგა 1-ის მე-16 ტურში მეცი პარი სენ-ჟერმენს უმასპინძლებს.
მატჩის განაცხადში სამივე ქართველი ფეხბურთელია: მეცის მხრიდან - გიორგი წიტაიშვილი და გიორგი აბუაშვილი, ხოლო პარიზელთა მხრიდან - ხვიჩა კვარაცხელია.
მეცს 15 ტურის შემდეგ 11 ქულა აქვს და სატურნირო ცხრილში ბოლო ადგილზე იმყოფება. უსაფრთხო ზონამდე სხვაობა 4 ქულაა. ქართველების გუნდმა ამ სეზონში მხოლოდ 3 მატჩის მოგება მოახერხა, თანაც სამივესი ზედიზედ, თუმცა გუნდმა ბოლო 3 შეხვედრა წააგო.
გიორგი წიტაიშვილის ანგარიშზე 1 გოლი და 1 საგოლე გადაცემაა, გიორგი აბუაშვილის კი - 1 გოლი.
რაც შეეხება პარი სენ-ჟერმენს, რაც არ უნდა გასაკვირი იყოს, გუნდი ლიგა 1-ს არ ლიდერობს. პირველ ადგილზე ლანსია 34 ქულით, ლუის ენრიკეს გუნდს კი 33 ქულა აქვს.
ასე რომ, პარიზელებისთვის დღევანდელ მატჩში გამარჯვება ძალიან მნიშვნელოვანია. თავის მხრივ ლანსი, რომელსაც ზედიზედ 5 მოგება აქვს, ნიცას უმასპინძლებს, რომელმაც ზედიზედ 8 შეხვედრა წააგო.
ლიგა 1-ის მიმდინარე სეზონში ხვიჩა კვარაცხელიას ანგარიშზე 3 გოლი და 3 საგოლე გადაცემაა.
სავარაუდო შემადგენლობები
მეცი - ფიშერი; კოლინი, ბამინი, იეგბე, ბალო-ტურე; ტურე, დემინჟე; საბალი, ჰეინი, წიტაიშვილი; ასორო
პსჟ - შევალიე; ზაირ-ემერი, ზაბარნი, პაჩო, მენდეში; ნევეში, მაიულუ, რუისი; ლი, დუე, მბაიე
დღეს გუნდების სასტარტო შემადგენლობებში მხოლოდ ერთ ქართველს, გიორგი წიტაიშვილს ელიან.
მეცისა და პარი სენ-ჟერმენის მატჩს რომან ლისორჟი განსჯის, რომელმაც ლიგა 1-ის მიმდინარე სეზონში 5 მატჩში იმსაჯა და მოთამაშეებს ჯამში 28 ყვითელი და 1 მეორე ყვითელი ბარათი უჩვენა, მან მხოლოდ 1 პენალტი დანიშნა.
ლისორჟს ამ სეზონში არც მეცისა და არც პარიზელთა მატჩში არ უმუშავია, თუმცა უეფას ჩემპიონთა ლიგის საკვალიფიკაციო ეტაპზე მალმიოსა და იბერიას შეხვედრა განსაჯა, რომელიც შვედური გუნდის გამარჯვებით 3-1 დასრულდა. ფრანგმა არბიტრმა 6 ყვითელი და 1 წითელი ბარათი აჩვენა მოთამაშეებს.
მეცი - პსჟ 22:00 საათზე დაიწყება.
