მატჩის ბოლოს, რომელიც ბარსამ ალავესს მოუგო, ფლიკის მიერ წარმოჩენილი სურათი საკმაოდ მკაცრი იყო. კადრში ჩანს, რომ გერმანელი მწვრთნელი შეშფოთებული სახით ესაუბრება რაფინიას.
ბრაზილიელი თავდამსხმელი მწვრთნელის გამხნევებას ცდილობდა. „მატჩის დასრულების შემდეგ რაფინია იმავეს მეუბნებოდა, რასაც წინა ჯერზე: ჩვენ გავუმჯობესდებით. მომდევნო მატჩებში ბევრად უკეთესები ვიქნებით,“ – აღნიშნა გერმანელმა.
რაფინიამ თავადაც ილაპარაკა იმ ცუდ შეგრძნებებზე, რაც მწვრთნელს ჰქონდა: „მწვრთნელმა იგრძნო, რომ მოედანზე ბევრად მეტი შეგვეძლო. ჩვენც ვიცით, რომ გაცილებით უკეთ თამაში შეგვიძლია.
მისი განცდაა, რომ გუნდი საუკეთესო ფორმაში არ არის და ამას ვეთანხმები. ძალიან ბევრი გვაქვს გასაუმჯობესებელი, მაგრამ დღეს ყველაზე მთავარი გამარჯვება იყო.
რაც ცუდად გამოგვდის, გამოსასწორებლად დრო გვაქვს და დარწმუნებული ვარ, ჩვენს საუკეთესო ფორმას დავუბრუნდებით. კარგად თამაშითაც მოვიგებთ, მაგრამ თუ არის თამაში, სადაც ცუდად ვითამაშებთ, არ მადარდებს, მთავარია, რომ მოვიგოთ.“
ფლიკმა თავისი ემოციური მდგომარეობის გასაჯაროება მატჩისშემდგომ პრესკონფერენციაზე არ ისურვა, თუმცა გუნდის რეალურ მდგომარეობაზე პირდაპირ განაცხადა: „ჩვენ არ გვაქვს წინა სეზონის კონტროლი და ინტენსიურობა. არ მადარდებს წინა სეზონი, კონცენტრაცია ამ სეზონზეა საჭირო.
წელს მეტმა ტრავმამ შეგვიშალა ხელი, ხოლო შარშან პრაქტიკულად ყველა ჯანმრთელი იყო. ყოველ თამაშსა და გამარჯვებასთან ერთად ვუმჯობესდებოდით და ეს სეზონიც კარგად მიდის, ოთხი გამარჯვება ზედიზედ, მაგრამ ამით დაკმაყოფილება არ შეგვიძლია. უნდა გავუმჯობესდეთ.“
ფლიკის მოთხოვნები
სეზონის პირველ თვეებში გერმანელი მწვრთნელი საკმაოდ კრიტიკული იყო საკუთარი გუნდის მიმართ და მოედანზე მათგან ბევრად მეტს ითხოვდა. ის მკაცრი იმიჯი, რომელიც ფლიკმა კამერების წინ დატოვა, გუნდში მომხდარი პროცესებისა და მომავლის შესახებ დაკვირვებას საჭიროებს.
