სანიოლი: "საქართველოში ბედნიერი ვარ და წასვლა არ მინდოდა"

ვილი სანიოლი საქართველოს ნაკრებთან ახალი, 4-წლიანი კონტრაქტის გაფორმებას გამოეხმაურა.

„მას შემდეგ, რაც ერთი ლამაზი ისტორია უკვე დავწერეთ, კიდევ ერთი მსგავსი ისტორიის დაწერა შეგვიძლია ახალ პროექტად მივიჩნიოთ. მნიშვნელოვანია, რომ ეს შეგვიძლია და მსურს ამის ნაწილი ვიყო. საქართველოში თავს ბედნიერად ვგრძნობ და რაიმეს შეცვლის მიზეზი არ მქონია.

საქართველოს ნაკრები უკვე ანგარიშგასაწევი გუნდია ევროპაში და ამას უნდა მივეჩვიოთ. კიდევ უფრო მეტი უნდა ვიშრომოთ, რათა გავაგრძელოთ ჩვენი დონის გაუმჯობესება.

გვსურს იმ გამოცდილების კიდევ ერთხელ გაზიარება, რომელიც გასულ ზაფხულს არა მხოლოდ გუნდმა, არამედ მთელმა ქვეყანამ მიიღო". - ციტირებს ფრანგი სპეციალისტის სიტყვებს ეროვნული ნაკრების ოფიციალური ვებ-გვერდი nakrebi.ge.