სატრანსფერო ომი: რეალი, სიტი და იუნაიტედი

.

წითელ ეშმაკებში კარგად ესმით, რომ მოედნის ცენტრი ის ზონაა, სადაც ხარისხის ნაკლებობაა. ბოლო კვირებში გუნდს არაერთი ვარსკვლავი დაუკავშირეს, მათ შორის: ელიოტ ანდერსონი, კარლოს ბალება, ჟოაო გომეში და სანდრო ტონალი არიან. თუმცა, სიაში კიდევ ერთი სახელი ფიგურირებს, რომელიც ბოლო დროს სულ უფრო ხშირად ისმის – კრისტალ პალასის ნიჭიერი ნახევარმცველი, ადამ უორტონი.

გავრცელებული ინფორმაციით, იუნაიტედი დარწმუნებულია, რომ ზაფხულში უორტონის ტრანსფერს დახურავს, თუმცა კონკურენცია დიდია. ფეხბურთელით ლივერპულიც ინტერესდება, ხოლო ესპანური გრანდი, მადრიდის რეალი, მას ერთ-ერთ პრიორიტეტულ სამიზნედ მიიჩნევს

ესპანური გამოცემა Defensa Central წერს, რომ ბოლო დღეებში სულ უფრო აქტიურდება საუბრები მანჩესტერ სიტის ვარსკვლავის, როდრი ერნანდესის რეალში შესაძლო გადასვლაზე. ეს პირდაპირ კავშირშია იუნაიტედთან, რადგან, როგორც ირკვევა, პეპ გვარდიოლა როდრის შემცვლელად სწორედ ადამ ვორტონს განიხილავს.

იმის გათვალისწინებით, რომ ესპანელ ნახევარმცველს კონტრაქტის ბოლო წელი ეწყება და თავადაც მადრიდში დაბრუნების სურვილი აქვს, სამეფო კლუბი ხელსაყრელ პოზიციაშია. ვარაუდობენ, რომ ტრანსფერი 40-50 მილიონ ევროდ შედგება. ეს კი სიტის ფინანსურ რესურსს მისცემს, რათა იუნაიტედს ცხვირწინ ააცალოს მათი მთავარი სატრანსფერო სამიზნე.

22 წლის უორტონმა მიმდინარე სეზონში 38 მატჩი ჩაატარა და 7 საგოლე გადაცემით გამოიჩინა თავი. მისი სტაბილური თამაში სწორედ ის არის, რაც ევროპულ გრანდებს ასე ხიბლავთ.