"შესანიშნავი გამოცდილება იყო" - ქოქრილი საქართველოს ნაკრებსა და შავ ლომს ტოვებს

რიჩარდ ქოქრილი საქართველოს ნაკრებისა და შავი ლომის მთავარი მწვრთნელის პოსტებს ტოვებს. ამის შესახებ რაგბის კავშირმა ოფიციალურად გამოაცხადა.

ინგლისელი სპეციალისტი რაგბის კავშირთან 2+2 სისტემის კონტრაქტით თანამშრომლობდა, რომლის პირველი ორწლიანი ვადი დეკემბრის ბოლოს იწურება და მისი გახანგრძლივება მხარეთა გეგმებში არაა.

"მინდა, მადლობა გადავუხადო საქართველოს რაგბის კავშირს იმ პატივისთვის, რასაც 2 წლის განმავლობაში საქართველოს ეროვნული ნაკრებისა და ფრენჩაიზის, შავი ლომის მთავარი მწვრთნელობა ჰქვია. რაგბის კავშირის ყოფილმა პრეზიდენტმა იოსებ ტყემალაძემ მომიწვია და ამ შესაძლებლობისთვის მას პირადად ვუხდი მადლობას.

2025 წლის აპრილში, სრკ-ს ახალი პრეზიდენტი დავით კაჭარავა გახდა. მას ეროვნული ნაკრების განვითარების განსხვავებული ხედვა აქვს და ამას პატივს ვცემ. წარმატებებს ვუსურვებ პირადად მას და მის გუნდს მომავალ საქმიანობაში.

ვამაყობ საქართველოს ნაკრების მთავარი მწვრთნელის პოსტზე გატარებული პერიოდით. მე შევქმენი მყარი ფუნდამენტი გუნდის მომავლისთვის და მას უკეთეს მდგომარეობაში ვტოვებ, ვიდრე მანამდე იყო.

საქართველო შესანიშნავი ქვეყანაა, გასაოცარი კულტურითა და თბილი, სტუმართმოყვარე ხალხით. უნიკალური სარაგბო და ცხოვრებისეული გამოცდილება შევიძინე", - ავრცელებს ქოქრილის სიტყვებს საქართველოს რაგბის კავშირის ოფიციალური ვებგვერდი.

54 წლის ინგლისელის თავკაცობით, საქართველოს ნაკრებმა რაგბი ევროპის ჩემპიონატი 2-ჯერ მოიგო (2024 და 2025 წლებში) და მოიპოვა 2027 წლის ავსტრალიის მსოფლიო თასის საგზური.

2024 წელს, ბორჯღალოსნებმა, ქოქრილის ხელმძღვანელობით, მესამე გამარჯვება მოიპოვეს ტიერ 1-ის გუნდთან.

მთლიანობაში, მისი თავკაცობით, საქართველოს ნაკრებმა 2 წლის განმავლობაში 22 თამაში ჩაატარა და მათგან 14-ში გამარჯვება იზეიმა.