„სუპერლიგა შეუძლებელი პროექტია“ — ლაპორტამ ბარსელონას გადაწყვეტილება განმარტა

ჟოან ლაპორტამ განმარტა ბარსელონას გადაწყვეტილება ევროპის სუპერლიგიდან გამოსვლის შესახებ.

„ეს იყო პროექტი, რომლის განხორციელებაც შეუძლებელია. მხოლოდ ხარჯები და არანაირი უპირატესობა. თავს არაკომფორტულად ვგრძნობდით, რადგან რეალთან საუკეთესო ურთიერთობა არ გვაქვს.

ჩვენ დავუბრუნდით ევროპულ ოჯახს. ოფიციალურად გამოვაცხადეთ სუპერლიგიდან გამოსვლის შესახებ. ფიფასთან ურთიერთობა დავალაგეთ, ჩეფერინთანაც ყველაფერი რიგზეა.

ჩვენ ვუბრუნდებით ყველა ორგანიზაციას ევროპული ფეხბურთის მდგრადი განვითარების მიზნით“, – განაცხადა ბარსელონას პრეზიდენტმა კლუბის მედიარესურსებთან ინტერვიუში.

ევროპის სუპერლიგა ტოპ-კლუბების მიერ ინიციირებული პროექტი იყო, რომლის მიზანსაც უეფას ჩემპიონთა ლიგის ალტერნატიული, დახურული ტურნირის შექმნა წარმოადგენდა. იდეას თავიდანვე დიდი წინააღმდეგობა მოჰყვა გულშემატკივრების, ფედერაციებისა და მთავრობების მხრიდან, რამაც დამფუძნებელი გუნდების უმეტესობა პროექტიდან გასვლას აიძულა.

ამ ეტაპზე სუპერლიგა პრაქტიკულად დაშლილია, რადგან ბარსელონასა და სხვა გრანდების ჩამოშორების შემდეგ, მისი რეალიზების შანსი მინიმუმამდე დავიდა.