ლა ლიგის მორიგ ტურში მადრიდის ატლეტიკომ სან მამესზე ბილბაოსთან 0:3 წააგო. მატჩის შემდეგ გუნდის ფეხბურთელებმა - მარკოს ლორენტემ და დავიდ ჰანცკომ გუნდში არსებულ კრიზისსა და ხულიან ალვარესის მნიშვნელობაზე ისაუბრეს.
თანაგუნდელების გზავნილი ალვარესს
მას შემდეგ, რაც კლუბმა არგენტინელის ბარსელონაში ტრანსფერი დაბლოკა, ალვარესმა სატრანსფერო ფანჯრის დახურვის შემდეგ პირველი მატჩი ჩაატარა. იგი მოედანზე შეცვლაზე შემოვიდა, თუმცა თამაშის გადარჩენა ვერ შეძლო. თანაგუნდელები მას სრულ მხარდაჭერას უცხადებენ:
მარკოს ლორენტე:
ხულიანი ჩვენთვის გადამწყვეტი მოთამაშეა და ეს თავადაც იცის. ის გუნდს თანდათან შეეწყობა. რაც მალე მოხდება ეს, მით უკეთესი, რადგან მისი გოლები სასიცოცხლოდ გვჭირდება. მას უნდა დავეხმაროთ, რომ 100%-იან ფორმას დაუბრუნდეს
დავიდ ჰანცკო:
ის მოედანზე განსხვავებას ქმნის და ძალიან მიხარია, რომ გუნდში დარჩა. მთელი კლუბი მხარს უჭერს.. ის ჩვენ გვჭირდება, და ვფიქრობ, ჩვენც ვჭირდებით მას
რა მოხდა სან მამესზე?
დიეგო სიმეონემ მატჩი ნომინალური თავდამსხმელის გარეშე დაიწყო, შეტევაში კი ალექს ბაენასა და კანგ-ინ ლის ენდო, თუმცა მადრიდელთა კრახი მეორე ტაიმის საწყის წუთებშივე დაიწყო:
ტაიმის განახლებიდან 120 წამში, ნიკო უილიამსმა (46') და რობერტ ნავარომ (48') ატლეტიკოს ორი გოლი გაუტანეს, რასაც მოგვიანებით ოიან სანსეტის მესამე ბურთიც დაემატა.
მოთამაშეების შეფასებით, გუნდმა კონცენტრაცია მეორე ტაიმის პირველ ხუთ წუთში სრულად დაკარგეს. ლორენტეს თქმით, ამ ჩავარდნამ გუნდის ამბიცია მოკლა და მეტოქეზე წნეხის განხორციელება ვეღარ შეძლეს.
მომდევნო ევროპული გამოცდა
ატლეტიკოსთვის მძიმე კვირა გრძელდება, მადრიდელები ოთხშაბათს ჩემპიონთა ლიგაზე ენფილდზე ლივერპულს დაუპირისპირდებიან, რის შემდეგაც ლა ლიგაში რეალ სოსიედადთან გასვლითი შეხვედრა ელით.
