"თუ ჩხუბი არ გინდა, კარიერა დაასრულე, დივიზიონს ნუ აყოვნებ", - ვოლკი ჯონ ჯონსს მიმართავს

UFC-ს ქვემსუბუქი წონის ჩემპიონმა, ალექსანდრ ვოლკანოვსკიმ მძიმე წონის ჩემპიონს, ჯონ ჯონსს რჩევა მისცა.

როგორც იცით, ჯონ ჯონსი თავისი დივიზიონის დროებით ჩემპიონ ტომ ასპინალთან დაპირისპირებაზე უარს აცხადებს, რის გამოც, ბევრის აზრით, UFC-მ მას ჩემპიონის ქამარი უნდა ჩამოართვას.

„როცა ჩემპიონი ხარ - ქამარი უნდა დაიცვა, ეს შენი პასუხისმგებლობაა. შედარებით აქტიური უნდა იყო. მითუმეტეს, როცა შენს წონას დროებითი ჩემპიონიც ჰყავს, ჩხუბს წინ არაფერი უნდა ედგას.

დივიზიონი არ უნდა დააყოვნო. ვიცი, რომ შესანიშნავი რეზიუმე გაქვს, ისტორიაში საუკეთესოდ მოიაზრები. თუმცა, თუ ჩხუბი არ გინდა, უბრალოდ კარიერა დაასრულე." - აღნიშნა ავსტრალიელმა მებრძოლმა. 

ტომ ასპინალმა 2023 წლის ნოემბერში მოიპოვა UFC-ს მძიმე წონის დროებითი ჩემპიონის სტატუსი და 2024-ს ივლისში ეს ტიტული წარმატებით დაიცვა. ბრიტანელს UFC-ში 8 გამარჯვება და 1 მარცხი აქვს, ერთის გარდა ყველა ბრძოლა ასპინალმა პირველივე რაუნდში მოიგო.