ეროვნული ლიგის 30-ე ტურში, ჩემპიონატის ლიდერები - გორის დილა და იბერია 1999, მიხეილ მესხის სახელობის სტადიონზე შეხვდნენ. იბერიელებმა 2:1 მოიგეს და ლიდერობა კიდევ ერთხელ დაიბრუნეს.
მატჩის მე-13 წუთზე, გიორგი ჯინჯოლავამ შორი მანძილიდან ულამაზესი გოლი შეაგდო და იბერია დააწინაურა. ჯინჯოლავასთვის სეზონში მე-2 გოლია - ასევე დინამო ბათუმს გაუტანა.
მე-19 წუთზე, თბილისელთა შემტევმა, გურამ გოშთელიანმა იუხეშა და VAR-ზე გადამოწმების შემდეგ, ალეკო აფციაურმა წითელი ბარათი უჩვენა.
ტაიმის დასრულებამდე 3 წუთით ადრე, ჯინჯოლავას კუთხურის შემდეგ, გორელებმა საჯარიმოში იუხეშეს და პენალტი დაინიშნა, თუმცა დავით კერესელიძემ ლუკა სილაგაძეს არ გაატანინა და დილა თამაშში დატოვა.
რიცხობრივი უპირატესობის მიუხედავად, დილამ პირველსავე ტაიმში მაინც გაუშვა - მსაჯის მიერ დამატებულ მე-7 წუთზე, იმავე ჯინჯოლავას ჩაწოდებული კუთხურის შემდეგ, დეო ბასინგამ ბურთი საკუთარ კარში ჩაჭრა - 2:0.
გორელებს თბილისელთა კართან ხიფათის შექმნა მეორე ტაიმშიც უჭირდათ. საბოლოოდ, ოთარ ფარულავამ 89-ე წუთზე სხვაობა შეამცირა, მაგრამ გუნდმა მეტის გაკეთება ვეღარ შეძლო და უმნიშვნელოვანესი თამაში წააგო. ფარულავას წლევანდელ სეზონში 8 საგოლე მოქმედება დაუგროვდა - 4 გოლი და 4 ასისტი.
იბერიელებმა დილას ეროვნული ლიგის მიმდინარე სეზონის მე-4 ურთიერთშეხვედრიდან მეოთხეც მოუგეს (ჯამური ბურთების სხვაობა - 10:1-ზე) და პირველ ადგილზეც გადაინაცვლეს - გუნდებს 62-62 ქულა აქვთ და გუგა ნერგაძის ბიჭები ლიდერობას სწორედ ურთიერთშეხვედრების ბალანსის გამო იმსახურებს.
საერთოდ, იბერია დილას უკვე ზედიზედ 7 მატჩია ამარცხებს. მათ შორის, აგვისტოში, ეროვნული ლიგის ეგიდით, გორში 6:0 მოუგო.
ჩემპიონატის დასრულებამდე 6 ტური რჩება. იბერია მომდევნო რაუნდში სტუმრად დინამო ბათუმს შეხვდება, დილა კი გორში ტორპედოს უმასპინძლებს.
