VIDEO: ისტორიაში პირველად - ეროვნული ლიგის ფეხბურთელმა აფრიკის თასზე ძირითადში ითამაშა

აფრიკის თასის ჯგუფური ეტაპის მე-3 ტურში, მოქმედმა ჩემპიონმა კოტ დ'ივუარის ნაკრებმა გაბონი 3:2 დაამარცხა და 1/8 ფინალში პირველი ადგილით გავიდა.

ამ შეხვედრაში, ქართული ფეხბურთისთვის, ისტორიული ფაქტი დაფიქსირდა - პირველად მოხდა, როცა ეროვნულ ლიგის მოქმედმა ფეხბურთელმა აფრიკის თასის მატჩი ძირითადი შემადგენლობიდან დაიწყო.

კოტ დ'ივუარელთა დაცვის მარჯვენა ფლანგს ჩემპიონ იბერია 1999-ის უკანახაზელი, არმელ ზოური ამაგრებდა - 76-ე წუთზე შეცვალეს, როცა მისი გუნდი 1:2-ს აგებდა.

ჩვენს ჩემპიონატში ნათამაშები კიდევ ერთი გამოსარჩევი აფრიკელი ფეხბურთელი ჩისამბა ლუნგუა, რომელმაც 2012 წელს, აფრიკის თასი საერთოდ მოიგო, ოღონდ, იმ პერიოდში ჩვენს ლიგაში უკვე აღარ თამაშობდა - ზუგდიდის ბაიას ღირსებას 2009-10 წლებში იცავდა.

ზოური იბერიელებმა ტირასპოლის შერიფიდან 2025 წლის ივლისში დაიმატეს - ეროვნული ლიგის მეორე ნახევარში 16 თამაში ჩაატარა და გუნდის გაჩემპიონებაში მნიშვნელოვანი წვლილი ჰქონდა (1-1 გოლი და ასისტიც მიითვალა).

კოტ დ'ივუარმა, მომავალში პიერ-ემერიკ ობამეიანგის გარეშე დარჩენილ გაბონთან გამარჯვებით, ჯგუფი 7 ქულით მოიგო და 1/8 ფინალში, 6 იანვარს, ბურკინა ფასოს შეხვდება.