VIDEO: მამუს კიდევ ერთი კარგი მატჩი - ტორონტომ ზედიზედ მეოთხედ მოიგო

სანდრო მამუკელაშვილის ტორონტო რეპტორსმა NBA-ის რეგულარულში ზედიზედ მე-4 გამარჯვება მოიპოვა. კანადელებმა ამჯერად ატლანტა ჰოუქსს სტუმრად აჯობეს - 109:97.

სანდრომ პარკეტზე 20:43 წუთი გაატარა და საკუთარ გუნდში მე-5 ყველაზე შედეგიანი გახლდათ - 12 ქულა, 6 მოხსნა და 1 ასისტი. მას წინა შეხვედრაში მილუოკისთან 15-ქულიანი (7 მოხსნასთან და 1 ასისტთან ერთად) მატჩი ჰქონდა.

ტორონტოს მხრიდან ბრენდონ ინგრამი (20 ქულა, 6 მოხსნა, 4 ასისტი), არ ჯეი ბარეტი (19 ქულა, 5 მოხსნა, 4 ასისტი), იმანუელ ქუიქლი (18 ქულა, 5 მოხსნა, 6 ასისტი) და სკოტ ბარნსი (14 ქულა, 10 მოხსნა, 4 ასისტი) გამოირჩნენ.

რეპტორსმა ზედიზედ მე-4 თამაში მოიგო, სეზონში კი მე-5 გამარჯვება იზეიმა და აღმოსავლეთ კონფერენციის საპლეიოფო, მე-8 ადგილზე იმყოფება.

სანდროს გუნდმა 5-მატჩიანი გასვლითი ტურნე ატლანტადან დაიწყო, 9 ნოემბრის 04:30 საათზე ფილადელფიაში ითამაშებენ, რის შემდეგაც ბრუკლინში, კლივლენდსა და ინდიანაში მოსინჯავენ ძალებს.