სიახლეები
სეტანტა
სპორტის გურუ
ქვიზები
Copyright © 2023 Adjarabet Arena. All Rights Reserved.
6 თვის წინ · 0 წთ წასაკითხად
-
Aa
+
ფონტის ზომა
როგორც მოგახსენეთ, ლივერპული ახლოსაა იურგენ კლოპის შემცვლელად ლისაბონის სპორტინგის მწვრთნელის, რუბენ ამორიმის დანიშვნასთან.
იხილეთ: სპორტინგის პორტუგალიელი მწვრთნელი ლივერპულს უახლოვდება
ამ სტატიაში შევეცდებით, უკეთ მოგახსენოთ, თუ ვინ არის და რას წარმოადგენს აღნიშნული სპეციალისტი.
საფეხბურთო კარიერა ამორიმს დიდად წარმატებული არ ჰქონია - კარიერა მან 2003-ში ბელენენსეშში დაიწყო და იქ 2008 წლამდე დარჩა, რის შემდეგაც პოზიციით ცენტრალური ნახევარმცველი 1 მილიონ ევროდ ბენფიკას შეუერთდა.
ლისაბონური კლუბის საკუთრებაში ამორიმი 2017 წლამდე იყო, თუმცა ორჯერ კლუბი იჯარით დატოვა - 2012-ში ბრაგაში გადავიდა, 2015-ში კი ალ ვაკრაჰში. ბევრად უკეთესი სიტუაცია არც ნაკრებში ყოფილა, რომლის მაისურითაც მან მხოლოდ 14 მატჩი ჩაატარა და ვერცერთი გოლი ვერ გაიტანა. ერთადერთი თამაში დიდ ტურნირზე მას 2014 წლის მსოფლიოზე, განასთან ჰქონდა, რომელიც პორტუგალიამ 2:1 მოიგო, მაგრამ ჯგუფში ჩარჩა. ამორიმმა ის მატჩი თავიდან ბოლომდე ჩაატარა.
საბოლოოდ, 2017-ში მან საფეხბურთო კარიერის დასრულება გადაწყვიტა და 2018-ში პორტუგალიური კაზა პია ჩაიბარა.
2019-ში მას ბრაგას მეორე გუნდი ანდეს, საიდანაც იმავე წელს პირველ გუნდამდე დააწინაურეს, რომელთან ერთადაც მან მხოლოდ 13 მატჩი ჩაატარა (10 მოიგო, 1 ფრე ითამაშა და 2-ჯერ დამარცხდა, გზად პორტუგალიის ლიგის თასის მოგებაც მოასწრო) და იმდენად მოახდინა შთაბეჭდილება ლისაბონის სპორტინგის ხელმძღვანელობაზე, რომ მათ ახალგაზრდა მწვრთნელში (იმდროისთვის მხოლოდ 35 წლის იყო) 10 მილიონი ევროც არ დაინანეს.
კაცმა, რომელიც თითქმის მთელი საფეხბურთო კარიერა ბენფიკას საკუთრებაში გაატარა, ჩაიბარა არწივების მთავარი მტერი, ლისაბონის სპორტინგი, რომელთან ერთადაც როგორც მწვრთნელმა თავი საუკეთესო მხრიდან წარმოაჩინა.
თავის პირველივე სრულ სეზონში, ამორიმმა სპორტინგი 20 წლის შემდეგ პირველად გააჩემპიონა და გზად პორტუგალიის ლიგის თასიც მოიგო, რომელზეც ტრიუმფი მეორე სეზონშიც გაიმეორა.
ჯამში, ამორიმს დღეის მონაცემებით სპორტინგის სათავეში 215 მატჩში აქვს ნამუშევარი, რომლებშიც მისმა გუნდმა 152 გამარჯვება მოიპოვა, 32 ფრე ითამაშა და 31-ჯერ დამარცხდა. მისმა გუნდმა 456 გოლი გაიტანა და მხოლოდ 182 გაუშვა.
რუბენ ამორიმი 8-ჯერ გახდა პორტუგალიის პრიმეირა ლიგის თვის საუკეთესო მწვრთნელი, 2021-ში კი სეზონის საუკეთესო მწვრთნელადაც დაასახელეს.
39 წლის პორტუგალიელი სპეციალისტის საყვარელი ფორმაცია 3-4-3-ია, რომლითაც მან მთავარ სამწვრთნელო წარმატებებს მიაღწია.
ამორიმის ეს წარმატებები შეუმჩნეველი არ დარჩა ევროპული გრანდებისთვის და მისთვის სერიოზული ბრძოლა გაჩაღდა, რომელსაც, როგორც ჩანს, ლივერპული იგებს.
ის თავადაც ვერ გვიდასტურებს, რომ მომდევნო სეზონშიც ლისაბონის სპორტინგის სათავეში იქნება:
„ვერ მოგცემთ გარანტიას, რომ მომავალ სეზონშიც სპორტინგში ვიქნები. ვერ გავაკეთებ იმას, რაც ჩაბი ალონსომ ქნა.
ჩემი მომავლის განსახილველად შესაბამის დროს შევარჩევთ და ამას გავაკეთებთ, ახლა მხოლოდ ტიტულების მოგებაზე ვარ ორიენტირებული და შემდეგ ვნახოთ, რა მოხდება."
საინტერესოა, რომ სიტყვა "ტიტულები" ბოლო წინადადებაში ამორიმს ტყუილად არ უხსენებია - 28 ტურის შემდეგ, მისი სპორტინგი ცხრილს ერთპიროვნულად ლიდერობს და უახლოეს მდევარ ბენფიკას 4 ქულით უსწრებს, მესამეადგილოსან პორტუს კი მთელი 13-ით, თანაც ისე, რომ ორივე ამ გუნდზე ერთით ნაკლები მატჩი აქვს ჩატარებული.
ფამალიკაოსთან გადადებული თამაშის მოგების შემთხვევაში, სპორტინგის უპირატესობა 7 ქულამდე გაიზრდება, რაც ჩემპიონატის დამთავრებამდე 6 ტურით ადრე საკმაოდ სოლიდური ჰანდიკაპია.
შესაბამისად, ლივერპულმა ხელში სულ რაღაც 10 მილიონ ევროდ შესაძლოა პორტუგალიის ორგზის ჩემპიონი და ევროპული ფეხბურთის ერთ-ერთი ყველაზე პერსპექტიული ახალგაზრდა სპეციალისტი ჩაიგდოს, დანარჩენს კი უკვე მხოლოდ მომავალი გვიჩვენებს.
კომენტარები