ალკარასი და სინერი ფედერერისა და ნადალის კვალდაკვალ

უიმბლდონის ფინალში გასვლით იანიკ სინერმა და კარლოს ალკარასმა ისეთ რამეს მიაღწიეს, რაც ღია ეპოქაში მხოლოდ როჯერ ფედერერსა და რაფაელ ნადალს ჰქონდათ გაკეთებული.

ფედერერისა და ნადალის გარდა, სინერი და ალკარასი როლან გაროსის ერთადერთი ფინალური წყვილია, რომელიც იმავე სეზონის უიმბლდონის ფინალშიც შეხვდებიან ერთმანეთს. როჯერმა და რაფამ ეს ზედიზედ 3-ჯერ, 2006-2008 წლებში შეძლეს.

ნადალმა მუშკეტერების თასი (როლან გაროსი) სამივე წელს აღმართა. 2006 და 2007 წლებში ფედერერმა მეტოქეს უიმბლდონის ფინალში მოგებით უპასუხა. 2008 წელს კი რაფამ ორივე ტურნირზე გაიმარჯვა.

ახლა მომენტუმი ალკარასის მხარესაა როლან გაროსზე მოპოვებული დაუვიწყარი გამარჯვებით, სადაც მან 3 საჩემპიონო ქულა გადაარჩინა, სანამ სინერს 5-სეტიან თრილერში დაამარცხებდა. ესპანელს ზედიზედ 24 მატჩი აქვს მოგებული, რაც მის კარიერაში ყველაზე გრძელი სერიაა.

სინერი ზედიზედ 4 გრანდ სლემის ფინალში გავიდა, საიდანაც გასული წლის US Open და ამ წლის Australian Open მოიგო. იტალიელი უიმბლდონის ფინალში პირველად ითამაშებს.

ბოლოს, როცა ერთი და იგივე წყვილი ზედიზედ გავიდა გრანდ სლემების ფინალში, 2016 წელს იყო ავსტრალიის ღია პირველობასა და როლან გაროსზე. მაშინ ნოვაკ ჯოკოვიჩმა ენდი მარი ზედიზედ 2-ჯერ დაამარცხა.

ალკარასი სინერს ურთიერთშეხვედრებში 8-4 უგებს, ბოლო ხუთივე შეხვედრა ესპანელის გამარჯვებით დასრულდა. ეს მათი მეორე დაპირისპირება იქნება გრანდ სლემის ფინალში.

უიმბლდონის ფინალი 13 ივლისს, 19:00 საათზე დაიწყება.