არაბული გვალვა გრძელდება - რონალდუმ მორიგი ფინალი წააგო

კრიშტიანუ რონალდუს არაბული უიღბლობა გრძელდება.

პირველი აღმოსავლური ტიტულის მოგების მორიგი შანსი პორტუგალიელმა დღეს, აზიის ჩემპიონთა ლიგა 2-ის, რომელიც ევროპის ლიგის ანალოგია, ფინალურ მატჩში გაუშვა ხელიდან.

გადამწყვეტ შეხვედრაში ალ ნასრის მეტოქე იაპონური გამბა ოსაკა იყო, რომელმაც ფინალი 1:0 მოიგო და რონალდუს მორიგი ტიტული წაართვა.

ფინალში ალ ნასრი დიდ სათამაშო უპირატესობას ფლობდა, იაპონელებმა კი ერთადერთი შანსი გამოიყენეს და თასსაც დაეუფლნენ.

ტიტულის მოგების მორიგი შანსი ალ ნასრს ჩემპიონატის ბოლო ტურში, 21 მაისს, დამაცთან ექნებათ. გამარჯვების შემთხვევაში გუნდი 2018/19 სეზონის შემდეგ პირველად შეძლებს ქვეყნის ჩემპიონატის მოგებას. 

ფრის ან მარცხის შემთხვევაში კი, თუ პარალელურ მატჩში ალ ჰილალმა სტუმრად ალ ფაიჰა დაამარცხა, ტიტულსაც სწორედ ეს გუნდი მოიგებს.

საუდის არაბეთში რონალდუს ერთადერთ ტიტულად 2023 წლის არაბეთის ჩემპიონთა თასი რჩება, ასევე ცნობილი როგორც მეფე სალმანის თასი, რომელიც ნახევრად ამხანაგურ ტურნირად მიიჩნევა.