მიკელ არტეტა კვადრუპლზე საუბარს ჯერ ერიდება, თუმცა პირობას დებს, რომ არსენალი მიმდინარე სეზონში ოთხივე ფრონტზე ბოლომდე იბრძოლებს.
ჩრდილოეთ ლონდონელები პრემიერ ლიგის სატურნირო ცხრილს ლიდერობენ და ამ უქმეებზე ევერტონს უმასპინძლებენ, მომდევნო კვირას კი ლიგის თასის ფინალში მანჩესტერ სიტის დაუპირისპირდებიან. გარდა ამისა, მეთოფეები ჩემპიონთა ლიგისა და ინგლისის თასის გადამწყვეტ ეტაპებზეც აგრძელებენ ასპარეზობას.
ბუნებრივია, მედიაში სულ უფრო ხშირად საუბრობენ კვადრუპლზე, მიღწევაზე, რომელიც ინგლისური ფეხბურთის ისტორიაში ჯერ არცერთ გუნდს არ დაუფიქსირებია. მიუხედავად ამისა, არტეტა მიიჩნევს, რომ მოვლენებს წინ არ უნდა გაუსწრონ. არსენალი ექვსწლიანი უტიტულო პერიოდის დასრულებას ცდილობს და ამ ეტაპზე მთავარი ამოცანა პრემიერ ლიგაში შვიდქულიანი უპირატესობის შენარჩუნებაა. შეგახსენებთ, რომ ლონდონელებს ინგლისის ჩემპიონატი 2004 წლის შემდეგ არ მოუგიათ.
„უბრალოდ გასახდელში უნდა შეხვიდეთ, რომ მიხვდეთ, რამდენად ვაფასებთ ჩვენს ამჟამინდელ პოზიციას და როგორ გვინდა სეზონის ბოლომდე ამ სიმაღლეზე დარჩენა,“ – განაცხადა ესპანელმა სპეციალისტმა მატჩისწინა პრესკონფერენციაზე.
„ყველაფერი ჩვენზეა დამოკიდებული. უნდა ვკონცენტრირდეთ იმაზე, რაც გასაკეთებელია და ეს ტემპი სეზონის ბოლომდე შევინარჩუნოთ. ახლა ყოველი მოგებული თამაში მიზნისკენ გადადგმული უდიდესი ნაბიჯია. ხვალ ძალიან რთული მატჩი გველის, გამარჯვება უნდა დავიმსახუროთ და თუ ამას შევძლებთ, ტიტულთან კიდევ უფრო ახლოს ვიქნებით.
„კვადრუპლზე ნამდვილად არ ვფიქრობ. ერთი ტურნირიდან მეორეზე გადავდივართ, მაგალითად, მომდევნო შვიდ დღეში სამ სხვადასხვა ტურნირზე მოგვიწევს თამაში. ეს დიდ ენერგიას მოითხოვს, ამიტომ ჩვენი მთავარი საზრუნავი თითოეული მატჩისთვის საუკეთესო კონდიციებში მომზადებაა,“ – დაამატა არტეტამ.
