„ბობი გენიოსი იყო, მო კი — გადამწყვეტი ძალა“ — იურგენ კლოპი ლივერპულის ლეგენდარულ ტრიოს იხსენებს

ლივერპულის ყოფილმა მთავარმა მწვრთნელმა, იურგენ კლოპმა, მოჰამედ სალაჰის, სადიო მანესა და რობერტო ფირმინოს ლეგენდარულ შეტევაზე ისაუბრა.

მას შემდეგ, რაც ეგვიპტელმა ვინგერმა კლუბიდან წასვლა დააანონსა, გერმანელმა სპეციალისტმა ეს ეპოქა ასე შეაჯამა:

„მო დიდი ხნის განმავლობაში მსოფლიო ფეხბურთის საუკეთესო შემტევი სამეულის ნაწილი იყო — მათ საუკეთესო სტატისტიკა ჰქონდათ. ეს ბევრ რამეზე მეტყველებს.

ადვილი არ არის, ამ ორ ბიჭზე ოდნავ მაღლა იდგე. თითოეულ მათგანს თავისი სპეციფიკური უნარები ჰქონდა, მაგრამ მო იყო ის, ვინც მატჩის ბედს წყვეტდა. მას ეს ყველაზე მეტად სურდა.

სადიო ორივეს კომბინაცია იყო — მას სურდა გოლების გატანა, მაგრამ ნახევარდაცვაში თამაშიც შეეძლო. ბობი კი გენიოსი იყო, რომელსაც სტატისტიკა საერთოდ არ ადარდებდა.

მო ყოველთვის გოლის გატანისკენ ისწრაფოდა. ამას ვერ ასწავლი და ვერ ავარჯიშებ. ეს მის შიგნითაა და ეს თვისება ცხოვრების ბოლომდე მასთან დარჩება.“

შეგახსენებთ, რომ სალაჰი ლივერპულს ამ სეზონის ბოლოს, თავისუფალი აგენტის სტატუსით დატოვებს.