მსოფლიო ფეხბურთმა მუნდიალზე სიმბოლიზმით სავსე ღამე იხილა.
ბალკანეთის ვარსკვლავმა 2026 წლის მსოფლიო ჩემპიონატიდან ხორვატიის გავარდნის მიუხედავად, კარიერა ლეგენდის სტატუსით დაასრულა. - beIN Sports-მა ლუკა მოდრიჩს სტატია მიუძღვნა.
1/16-ფინალში პორტუგალიისა და ხორვატიის დაპირისპირებაში ლუკა მოდრიჩმა, სავარაუდოდ, მსოფლიო ჩემპიონატზე თავისი კარიერის ბოლო მატჩი და, დიდი ალბათობით, ხორვატიის ეროვნული ნაკრების მაისურით ბოლო შეხვედრაც ჩაატარა.
40 წლის ხორვატი ნახევარმცველი ემოციური და დაძაბული მარცხის შემდეგ სანაკრებო კარიერას ემშვიდობება.
მატჩი განსაკუთრებული იყო იმითაც, რომ მასში ერთმანეთს კვლავ შეხვდნენ მადრიდის რეალში ყოფილი თანაგუნდელები, ლუკა მოდრიჩი და კრიშტიანუ რონალდუ.
ტორონტოში გამართული შეხვედრა სავსე იყო დრამატული მომენტებით, გოლებით, VAR-ის ჩარევებით და დასრულდა 2 ლეგენდის ემოციური ჩახუტებით, რომლებმაც მთელი ეპოქა განსაზღვრეს.
ემოციური დამშვიდობება
მატჩი თავიდანვე მაღალი ინტენსივობითა და დრამატიზმით წარიმართა.
ხორვატია მეორე ტაიმის დასაწყისში ივან პერიშიჩის გოლით დაწინაურდა, თუმცა პორტუგალიამ მალევე უპასუხა, კრიშტიანუ რონალდუმ მსოფლიო ჩემპიონატის პლეი-ოფში თავისი პირველი გოლი გაიტანა და ანგარიში გაათანაბრა.
დამატებული დროის მიწურულს გონსალუ რამოშმა გადამწყვეტი გოლი გაიტანა, პორტუგალია შემდეგ ეტაპზე გაიყვანა და ხორვატიის მსოფლიო ჩემპიონატის კამპანია მტკივნეულად დაასრულა.
შეხვედრამ კიდევ უფრო დრამატული ხასიათი მიიღო, როდესაც იოშკო გვარდიოლმა თითქოს ანგარიში გაათანაბრა, მაგრამ VAR-ის გადამოწმების შემდეგ გოლი თამაშგარე მდგომარეობის გამო გაუქმდა და ხორვატებს დამატებით დროში გასვლის შანსი წაერთვათ.
მიუხედავად იმისა, რომ მოდრიჩს არც გოლი გაუტანია და არც საგოლე გადაცემა გაუკეთებია, მან კიდევ ერთხელ აჩვენა ლიდერის თვისებები.
გამოცდილმა ნახევარმცველმა გუნდში საუკეთესო მაჩვენებელი, 8 ბურთის დაბრუნება, დააფიქსირა, შექმნა 2 საგოლე მომენტი, პასების 87 პროცენტი ზუსტად შეასრულა, ბურთთან 66 შეხება ჰქონდა და 9 ორთაბრძოლა მოიგო.
შესაძლოა, ეს მისი ბოლო მატჩი იყო მსოფლიო ჩემპიონატზე, მაგრამ მოდრიჩი კვლავ ხორვატიის ნახევარდაცვის დირიჟორად დარჩა.
ტურნირის განმავლობაში მან საგოლე გადაცემა გააკეთა განასთან 2:1 მოგებულ შეხვედრაში, რომელმაც ხორვატია 1/16-ფინალში გაიყვანა, და დაუღალავად იბრძოდა ინგლისისა და პანამის წინააღმდეგ მატჩებშიც.
როგორც ყოველთვის, ის თამაშის ტემპს თავისი გამორჩეული პასებით აკონტროლებდა და ბოლო წამამდე მებრძოლ ხორვატიის ნაკრებს წინ უძღვებოდა.
მოდრიჩის მემკვიდრეობა მსოფლიო ჩემპიონატზე
მსოფლიო ჩემპიონატებზე ლუკას გამორჩეული კარიერა, რომელიც 5 ტურნირს მოიცავდა (2006, 2014, 2018, 2022 და 2026 წლებში) დასრულდა.
ხორვატთა კაპიტანმა 2018 წლის მუნდიალზე საკუთარი ქვეყნის გუნდი ფინალში გაიყვანა და ტურნირის საუკეთესო ფეხბურთელისთვის განკუთვნილი ოქროს ბურთიც მოიპოვა.
2022 წლის მსოფლიო ჩემპიონატზე კატარში მოდრიჩმა კიდევ ერთხელ ითამაშა გადამწყვეტი როლი და ხორვატია მე-3 ადგილამდე მიიყვანა.
განსაკუთრებით დასამახსოვრებელი იყო მეოთხედფინალში ბრაზილიასთან გამარჯვება, როდესაც ხორვატებმა სელესაო პენალტების სერიაში დაამარცხეს.
მოდრიჩმა მუნდიალებზე კარიერა 23 მატჩით დაასრულა და ყველაზე მეტ მატჩში მონაწილე ფეხბურთელთა სიაში მე-5 ადგილს პაოლო მალდინისთან ერთად იყოფს.
მსოფლიო ჩემპიონატებზე ლუკამ 2 გოლი გაიტანა და 2 საგოლე გადაცემა შეასრულა.
მოდრიჩის მემკვიდრეობა უკვე მყარად არის აღქმული, როგორც მუნდიალების თანამედროვე ეპოქის ერთ-ერთი ყველაზე გავლენიანი ნახევარმცველისა და საკუთარი თაობის ერთ-ერთი გამორჩეული ფეხბურთელის.
პატივისცემით გამყარებული მემკვიდრეობა
საბოლოო სასტვენის შემდეგ საღამოს ყველაზე ემოციური მომენტი ლუკა მოდრიჩისა და კრიშტიანუ რონალდუს ჩახუტება იყო, ურთიერთპატივისცემის სიმბოლო, რომელიც მათ შორის ათწლეულზე მეტი ხნის განმავლობაში ჩამოყალიბდა.
2012-2018 წლებში რეალში თამაშისას მათ ერთად არაერთი ჩემპიონთა ლიგა მოიგეს და კლუბის ისტორიაში ერთ-ერთი ყველაზე წარმატებული ეპოქის მთავარი ფიგურები გახდნენ.
სანაკრებო დონეზე ისინი ერთმანეთს 4-ჯერ შეხვდნენ, ერთხელ მსოფლიო ჩემპიონატზე, ერთხელ ევროპის ჩემპიონატზე და 2-ჯერ ამხანაგურ მატჩებში. ოთხივე შეხვედრა რონალდუსა და პორტუგალიის გამარჯვებით დასრულდა.
კანადაში გამართულ მსოფლიო ჩემპიონატამდე მათი ბოლო დიდი დაპირისპირება ევრო 2016-ზე შედგა, როდესაც პორტუგალიამ დამატებით დროში 1:0 გაიმარჯვა.
მათი ჩახუტება სანაკრებო ფეხბურთში ოქროს ეპოქის დასრულების სიმბოლოდ იქცა.
მსოფლიო ჩემპიონატს მიღმა დარჩენილი მემკვიდრეობა
ლუკა მოდრიჩი ხორვატიის ნაკრებს შთამბეჭდავი სტატისტიკით ტოვებს - 202 მატჩი, 29 გოლი და 32 საგოლე გადაცემა.
2018 წელს მოდრიჩმა როგორც ოქროს ბურთი, ისე The Best FIFA Men's Player-ის ჯილდო მოიგო და ინდივიდუალური ჯილდოების ბრძოლაში ლიონელ მესისა და კრიშტიანუ რონალდუს ათწლიანი დომინაცია შეწყვიტა.
მოდრიჩი კარიერას ასევე ფეხბურთის ისტორიაში ერთ-ერთი ყველაზე ტიტულოვანი მოთამაშის სტატუსით ასრულებს. მის ანგარიშზე 34 ტიტულია, მათ შორის 28 მადრიდის რეალთან და 6 ზაგრების დინამოსთან ერთად.
მის შთამბეჭდავ კოლექციაში შედის 6 ჩემპიონთა ლიგა, 6 FIFA-ს საკლუბო მსოფლიო ჩემპიონატი და 4 ლა ლიგის ტიტული.
ცოტას თუ დაუტოვებია ფეხბურთზე ისეთი გავლენა, როგორიც ლუკა მოდრიჩს. მისი სანაკრებო კარიერის დასრულებით მსოფლიო ფეხბურთი ერთ-ერთ დიდებულ მოთამაშეს ემშვიდობება.
