მადრიდის რეალში ვითარება იძაბება.. გუნდი სტაბილურობას ვერ პოულობს, ბოლო წარმატებული სერია კი ჯერ კიდევ სექტემბრის დასაწყისში, ჩაბი ალონსოს დროს ჰქონდა.
ამჟამინდელ მწვრთნელს, ალვარო არბელოას, სეზონის ბოლომდე რთული ბრძოლა ელის, რასაც ტრავმირებული ფეხბურთელების სიმრავლეც ართულებს.
ხეტაფესთან მარცხის (0:1) შემდეგ, რაც რეალისთვის ზედიზედ მეორე წაგება იყო ლა ლიგაში, კლუბის ხელმძღვანელობა არბელოას გრძელვადიანი პერსპექტივის მიმართ ნდობას კარგავს. მიუხედავად იმისა, რომ გუნდს კილიან მბაპე და ჯუდ ბელინგემი აკლდა, ხეტაფესა და ოსასუნასთან ნაჩვენები თამაში და მომენტების შექმნის პრობლემა გამართლებად არ მიიჩნევა.
კრიზისული შეხვედრა და რთული კალენდარი
Cadena Cope-ის ინფორმაციით, არბელოამ ფეხბურთელებთან კრიზისული შეხვედრა გამართა. მან მოთამაშეებს დამატებითი ძალისხმევისკენ მოუწოდა და აღნიშნა, რომ მათ მიმართ პრეტენზიები არ აქვს, თუმცა სეზონის ფინალურ ეტაპზე მაქსიმალური მობილიზებაა საჭირო. ამჟამად მადრიდელები ბარსელონას 4 ქულით ჩამორჩებიან.
გუნდში მორალური მდგომარეობაც ძალიან მძიმეა და გასახდელში ფიქრობენ, რომ ლა ლიგის ტიტული ხელიდან ეცლებათ. რეალს წინ ურთულესი გრაფიკი ელის: პარასკევს გასვლა სელტა ვიგოსთან, ჩემპიონთა ლიგის მერვედფინალში დაპირისპირება მანჩესტერ სიტისთან და სანაკრებო პაუზამდე მადრიდული დერბი ატლეტიკო მადრიდის წინააღმდეგ.
