გერმანულმა ვებ-გვერდმა Bulinews.com-მა ბუდუ ზივზივაძე ჰაიდენჰაიმის 2025-26 წლების სეზონის საუკეთესო ფეხბურთელად დაასახელა.
წინა სეზონში ყველა დროის ერთ-ერთი ყველაზე შთამბეჭდავი გადარჩენის შემდეგ, როდესაც ჰაიდენჰაიმმა პლეი-ოფში დაქვეითებას თავი დააღწია, ახლად დასრულებულ 2025-26 წლების სეზონში იგივე ბედნიერი დასასრული აღარ განმეორდა. ფინიშამდე გმირული ბრძოლების მიუხედავად, ბოლო ტურში მაინცთან 2:0 მარცხმა ბადენ-ვიურტემბერგის კლუბის ბუნდესლიგაში სამწლიანი ყოფნა დაასრულა.
ერთ-ერთი ფეხბურთელი, რომელმაც ყველაფერი გააკეთა იმისთვის, რომ ჰაიდენჰაიმი უმაღლეს დივიზიონში დარჩენილიყო, სწორედ ბუდუ ზივზივაძე იყო. ქართველმა თავდამსხმელმა, ისევე როგორც მისმა ბევრმა თანაგუნდელმა, სეზონის განმავლობაში რთული პერიოდები გადაიტანა, თუმცა საბოლოოდ ფორმაში შევიდა და თავისი 6 ბუნდესლიგური გოლიდან 5 სეზონის ბოლო 6 შეხვედრაში გაიტანა.
მიუხედავად იმისა, რომ 32 წლის ფეხბურთელს კვლავ გერმანიის მე-2 ბუნდესლიგაში მოუწევს თამაში, მისი პროფილი ზუსტად შეესაბამება იმ მოთხოვნებს, რაც ამ ლიგაში წარმატებისთვისაა საჭირო. 188 სმ სიმაღლის ზივზივაძის ბურთის დაჭერის უნარი, საჰაერო ორთაბრძოლებში უპირატესობა და დაცვის ფაზაში თავდადება, უდავოდ დიდ დახმარებას გაუწევს ჰაიდენჰაიმს მომავალ სეზონში. თუ ის სეზონს წარმატებით დაიწყებს, კლუბს ბუნდესლიგაში სწრაფი დაბრუნების რეალური შანსი ექნება.
ჰაიდენჰაიმის ფორვარდისთვის სეზონის გამორჩეული მომენტი მატჩის 32-ე ტურში ბაიერნთან 3:3 დასრულებული შეხვედრა იყო. როდესაც გადარჩენისთვის ბრძოლაში ყოველი ქულა გადამწყვეტ მნიშვნელობას იძენდა, ზივზივაძემ მარნონ ბუშის თავური გადაცემის შემდეგ ბურთი იონას ურბიგის კართან ახლო კუთხეში გადაგზავნა. შემდეგ ერენ დინქჩიმ ჰაიდენჰაიმის უპირატესობა ორამდე გაზარდა, თუმცა ლეონ გორეცკას დუბლი ანგარიშს კვლავ გაათანაბრებდა.
მიუნხენში მატჩის ბოლო მეოთხედში, როდესაც მასპინძლები ზეწოლას აძლიერებდნენ, ჰაიდენჰაიმმა ალიანც არენაზე კვლავ გააოცა ყველა ზივზივაძის მე-2 გოლით. 32 წლის ქართველმა მაიკლ ოლისეს აუარა გვერდი, შიგნით შეიჭრა და ულამაზესი დარტყმით ბურთი ურბიგის გაწვდილი ხელების ზემოთ შორეულ კუთხეში გაგზავნა.
ჰაიდენჰაიმი ისტორიული გამარჯვების ზღვარზე იდგა, თუმცა დამატებულ დროში ოლისეს დარტყმა ზუსტი აღმოჩნდა და მატჩი ფრედ დასრულდა.
