ბოსნიამ ისტორია დაწერა და მსოფლიო ჩემპიონატის საგზური მოიპოვა. დრამატული მატჩი 1:1 დასრულდა, პენალტების სერიაში კი ბოსნიელებმა მეტოქეს აჯობეს. გმირი მეკარე ნიკოლა ვასილი გახდა, იტალიელთა მხრიდან კი დარტყმები პიო ესპოზიტომ და ბრაიან კრისტანტემ გააფუჭეს. ბილინო პოლიეზე ნამდვილი სახალხო დღესასწაული დაიწყო.
VIDEO: აძურას კრახი გრძელდება — იტალია ზედიზედ მესამე მსოფლიოს გამოტოვებს
იმ ღამეს კიდევ ერთი რამ მოხდა, რაც სოციალურ ქსელებში სწრაფად გავრცელდა.
პენალტების სერიის შემდეგ, განრისხებულმა ჯანლუიჯი დონარუმამ ვასილის ის ჩანაწერები დაუხია, რომლებსაც ბოსნიელი მეკარე პენალტების დროს იყენებდა. სიტუაცია დაიძაბა და საქმეში მსაჯი კლემან ტურპენი ჩაერია, საბოლოოდ კი ლეონარდო ბონუჩიმ იტალიელი მეკარე მოედანს გაარიდა.
სწორედ ამ დროს მოხდა გაუთვალისწინებელი რამ: ბურთის მიმწოდებელმა ბიჭმა მოახერხა და თავად დონარუმას პენალტების „შპარგალკას“ დაეუფლა.
ბიჭი იდენტიფიცირებულია - ის აფან ჩიზმიჩია, კლუბ ჩელიკის ახალგაზრდა თავდამსხმელი. მან მოგვიანებით გაამჟღავნა, თუ რა ეწერა ფურცელზე:
იქ მითითებული იყო რომელ ფეხს იყენებენ ფეხბურთელები და როგორ ურტყამენ პენალტებს. მიდიან მარცხნივ, მარჯვნივ, თუ ელოდებიან მეკარის მოძრაობას.
ჩანაწერები მოიცავდა დეტალურ ინსტრუქციებს:
SX / DX – მარცხენა ან მარჯვენა ფეხი;
Chiuso / Aperto – დარტყმის კუთხე (ჩაკეტილი თუ ღია);
Guarda – ფეხბურთელის ქცევა დარტყმამდე (სად იყურება).
უბრალო ჩანაწერებისგან განსხვავებით, დონარუმას ვერსია დაბეჭდილი და სპეციალურად ლამინირებული იყო მატჩისთვის. აფანმა ასევე ისაუბრა მომენტზე, როდესაც მეკარე მიხვდა, რომ ფურცელი გაქრა:
ის ყველგან ეძებდა მას, დაცვის თანამშრომლებსაც კი აბრალებდა. ძალიან გაბრაზებული და იმედგაცრუებული იყო.
ახალგაზრდა ფეხბურთელმა გამოაცხადა, რომ აპირებს ამ ფურცლის აუქციონზე გატანას, მიღებულ თანხას კი ქველმოქმედებას მოახმარს.
