დაჩრდილავს ბერნალი დე იონგს? ბარსელონა ახალგაზრდებს წაახალისებს

ბარსელონა ლა მასიას ორი გამორჩეული აღზრდილისთვის, ჟერარ მარტინისა და მარკ ბერნალისთვის კონტრაქტების გაუმჯობესებას გეგმავს.

Mundo Deportivo-ს ინფორმაციით, კლუბს სურს ფეხბურთელების ხელშეკრულებები მათ ახალ სტატუსს შეუსაბამოს, რადგან ორივე მათგანი პირველი გუნდისთვის სულ უფრო მნიშვნელოვანი ხდება.

მიუხედავად იმისა, რომ ორივე მოთამაშემ კონტრაქტები 2025 წელს გაახანგრძლივა, მიმდინარე სეზონში მათმა სწრაფმა პროგრესმა კლუბს გადაწყვეტილება შეაცვლევინა. ჰანსი ფლიკი ახალგაზრდებს სრულად ენდობა და მათი როლი იმაზე ბევრად დიდია, ვიდრე ამას არსებული ხელშეკრულებები ითვალისწინებს.

ჟერარ მარტინის შემთხვევა განსაკუთრებით საინტერესოა. 2025 წლის იანვარში მან ხელშეკრულება 2028 წლამდე გააფორმა, სადაც გამოსასყიდ თანხად 100 მილიონი ევრო მიეთითა. მაშინ ის სათადარიგო ვარიანტად განიხილებოდა, თუმცა დღეს მარტინი ძირითადი შემადგენლობის საიმედო წევრად ჩამოყალიბდა.

რაც შეეხება მარკ ბერნალს, მისი წინსვლა კიდევ უფრო შთამბეჭდავია. ახალგაზრდა ნახევარმცველმა ბარსელონასთან კონტრაქტი 2029 წლამდე 2025 წლის სექტემბერში, მძიმე ტრავმის მიღებიდან მალევე გააფორმა. კლუბმა მას მაშინვე დიდი ნდობა გამოუცხადა და გამოსასყიდი თანხა 500 მილიონ ევრომდე გაზარდა.

თუმცა, ბერნალი ფლიკის ხელში მოედნის ცენტრის შეუცვლელ ფიგურად იქცა. მან ისე კარგად ჩაანაცვლა ტრავმირებული ფრენკი დე იონგი, რომ კატალონიაში უკვე იმაზე მსჯელობენ, მოუწევს თუ არა ნიდერლანდელს სათადარიგოთა სკამზე დაჯდომა ბერნალის ბრწყინვალე ფორმის გამო. სწორედ ამიტომ, ბარსელონა მიიჩნევს, რომ ბერნალის პირობების კიდევ ერთხელ გადახედვა სავსებით სამართლიანია.