დემბელეს ირონიული მესიჯი მბაპეს: დაძაბულობა ყოფილ თანაგუნდელებს შორის

პარი სენ-ჟერმენის მიერ ბრესტის მინიმალური ანგარიშით (1-0) დამარცხების შემდეგ, უსმან დემბელემ ოქროს ბურთის შესახებ საინტერესო კომენტარი გააკეთა, რომელიც კილიან მბაპესკენ მიმართულ ფარულ გზავნილს გავდა.

როდესაც ყოფილმა თავდამსხმელმა გიომ ოარომ აღნიშნა, რომ ფრანგი გარემარბი ამ პრესტიჟულ ჯილდოზე ყოველთვის მოკრძალებულად საუბრობდა, დემბელემ უპასუხა:

მე არასდროს ვყოფილვარ რჩეული. კარიერის დასაწყისიდანვე ამ თემაზე ხმა არ ამომიღია, უბრალოდ საკლასო ოთახის ბოლოში ვიჯექი და თავდაუზოგავად ვმუშაობდი

2025 წლის ოქროს ბურთის მფლობელის მიერ გამოყენებული ფრაზა, „რჩეული“, შემთხვევითი სულაც არ არის. სულ ახლახან, L'Equipe-თან ვრცელ ინტერვიუში, მადრიდის რეალის ვარსკვლავმა, კილიან მბაპემ მთავარი ინდივიდუალური ჯილდოს ფავორიტად საკუთარი თავი დაასახელა და ყოფილ თანაგუნდელს ასე შეეხო:

ის ყოველთვის ნიჭიერ მოთამაშედ ითვლებოდა, მე კი - რჩეულად. დასაწყისიდანვე მწვერვალზე ვიყავი, მას კი განსხვავებული გზა და ტრავმები ჰქონდა, თუმცა ეს ყველაფერი კარგად გამოასწორა

სწორედ ამიტომ, დემბელეს სიტყვები მადრიდელი თანამემამულის თავდაჯერებულ განცხადებაზე პირდაპირ პასუხად აღიქმება, მიუხედავად იმისა, რომ მათ დღემდე მეგობრული ურთიერთობა აკავშირებთ.

შეგახსენებთ, რომ ოქროს ბურთის წლევანდელი დაჯილდოების გალა-ცერემონია 26 ოქტომბერს, ლონდონში გაიმართება, სადაც გაირკვევა, ვის დარჩება ფეხბურთის მთავარი ინდივიდუალური ტროფეი.