მესიზე და რონალდუზე უკეთესი? - საოცარი იამალი

ლამინ იამალი ბარსელონაში საკუთარი ისტორიის წერას აგრძელებს.

ესპანური ფეხბურთის ტალანტმა ლა ლიგის საწყის 5 ტურში მესამე დუბლი შეასრულა და 21-ე საუკუნეში ლიონელ მესის მიერ დამყარებული უნიკალური რეკორდი გაიმეორა.

Mundo Deportivo-ს ცნობით, 2012-13 წლების სეზონის შემდეგ, იამალი პირველი ფეხბურთელია, ვინც ჩემპიონატის სტარტზე ასეთი ფენომენალური შედეგიანობა აჩვენა. საგულისხმოა, რომ მსგავსი რამის გაკეთება ესპანეთში ნათამაშებ ისეთ ლეგენდარულ ბომბარდირებსაც კი არ გამოუვიდათ, როგორებიც კრიშტიანუ რონალდუ, ლუის სუარესი, დავიდ ვილია და ფერნანდო ტორესი იყვნენ. ბარსელონას გარემარბმა ორი გოლის გატანა ლევანტესთან, ვალენსიასთან და რაიო ვალეკანოსთან მოახერხა.

ახალგაზრდა ჯადოქრის ბრწყინვალე ფორმა მხოლოდ ამ ერთი ისტორიული მიღწევით არ შემოიფარგლება. მიმდინარე სეზონში ჩატარებულ 6 ოფიციალურ შეხვედრაში მის აქტივში უკვე 7 გოლი და 2 შედეგიანი გადაცემაა. ლა ლიგის ბომბარდირთა დავას კი ის თანაგუნდელ რაფინიასთან, კილიან მბაპესთან და სერხიო კამელიოსთან ერთად 6-6 გატანილი ბურთით ლიდერობს.

იამალისა და რაფინიას შემტევი დუეტი წელს ნამდვილად შეუჩერებელია - კატალონიური კლუბის მიერ საწყის ტურებში გატანილი 21 გოლიდან 12 სწორედ მათზე მოდის, რითაც ბარსელონა სატურნირო ცხრილის სათავეში დამაჯერებლად იმყოფება.