დიოგუ ჟოტას უკანასკნელი მესიჯი

საშინელი ტრაგედიიდან თითქმის ერთი წელი გავიდა, თუმცა ლივერპულის ფორვარდის, დიოგუ ჟოტას გარდაცვალების დეტალები საზოგადოებისთვის კვლავ მტკივნეულია.

ახლახან გამოცემულ ბიოგრაფიულ წიგნში მისი მეუღლე, რუტე კარდოსო, იმ უკანასკნელ შეტყობინებაზე საუბრობს, რომელიც ფეხბურთელმა ვეღარ წაიკითხა.

ტრაგედია პორტუში გამართული ქორწილიდან სულ რაღაც 11 დღეში მოხდა. 28 წლის ფეხბურთელი ინგლისში ბრუნდებოდა, როდესაც ესპანეთის ჩრდილოეთით მისი ლამბორგინი გზიდან გადავარდა. ავარიას დიოგუ ჟოტა და მისი უმცროსი ძმა, ანდრე სილვა ემსხვერპლნენ. როგორც ცნობილია, ფეხბურთელს ფრენა ფილტვის ოპერაციის გამო აუკრძალეს, რის გამოც მან მგზავრობა ავტომობილით გადაწყვიტა.

რუტე კარდოსომ მეუღლეს შეტყობინება ავარიამდე ცოტა ხნით ადრე გაუგზავნა: „სიყვარულო, როგორც კი გაჩერდები, დამირეკე, რაღაც უნდა გაჩვენო“. მას სურდა დიოგუსთვის მათი ქორწილის ვიდეო გაეზიარებინა, რომელიც სწორედ იმ დროს მიიღო. პასუხმა დააგვიანა, რამაც ოჯახში ეჭვი გააჩინა, რამდენიმე საათში კი საშინელი რეალობა დადასტურდა.

გამოძიების ვერსიით, კატასტროფა საბურავის გასკდომამ და გადაჭარბებულმა სიჩქარემ გამოიწვია. ავტომობილს ცეცხლი გაუჩნდა, რამაც ძმებს გადარჩენის შანსი არ დაუტოვა. ლივერპულისთვის ეს უდიდესი დანაკარგი იყო, თუმცა წიგნი „Nunca Mais e Muito Tempo“ გვიჩვენებს, რომ სპორტული მიღწევების მიღმა, დიოგუ ჟოტა პირველ რიგში ოჯახზე ორიენტირებული და თავმდაბალი ადამიანი იყო.

წიგნში ფეხბურთელის მშობლებიც იხსენებენ იმ საბედისწერო ღამეს. მამამისი, ჟოაკიმი ამბობს, რომ რუტეს ზარის შემდეგ მაშინვე ცუდი წინათგრძნობა დაეუფლა, ხოლო დედა, იზაბელი იხსენებს უპასუხოდ დარჩენილ მესიჯებს, რომლებიც შვილების ტელეფონებზე მანამდე გაგზავნა, სანამ ტრაგედიის შესახებ შეიტყობდა.