ემი მარტინესის ტრანსფერზე კლუბებს შორის მოლაპარაკებები ჩაიშალა

ასტონ ვილას მეკარე ემილიანო მარტინესი მიმდინარე ზაფხულს იუვენტუსში არ გადავა, კლუბებს შორის მოლაპარაკებები დასრულებულია.

კვირას The Athletic-მა გაავრცელა ინფორმაცია, რომ ვილამ იტალიური კლუბისგან 33 წლის მეკარის თაობაზე ახალი შეთავაზება მიიღო.

მოლაპარაკებების შედეგად მხარეებს შორის ფეხბურთელის შეფასებასთან დაკავშირებული სხვაობა შემცირდა, ხოლო პირადი კონტრაქტის პირობებზე შეთანხმება არგენტინელი მეკარისთვის პრობლემა არ იქნებოდა.

თუმცა, იუვენტუსმა ტრანსფერის განხორციელებაზე უარი თქვა და ახლა ყურადღებას სხვა სამიზნეებზე გადაიტანს.

ამავდროულად, ასტონ ვილამ პარმას მეკარის, ძიონ სუძუკის ტრანსფერზე შეთანხმებას მიაღწია. კლუბი იაპონელ ფეხბურთელს 2026/27 წლების სეზონისთვის ძირითად მეკარედ განიხილავს.

ვილამ სუძუკის ტრანსფერზე მუშაობა მარტინესის მომავალთან დაკავშირებული მოლაპარაკებების პარალელურად გააქტიურა. იაპონელი მეკარე პრემიერ ლიგის კლუბს მარტინესის მომავალის მიუხედავად შეუერთდება.

სუძუკისთვის მზად არის ხუთწლიანი კონტრაქტი, რომელიც 2031 წლამდე იქნება ძალაში. ტრანსფერის საწყისი ღირებულება 30 მილიონი ევროა, ბონუსების გათვალისწინებით კი თანხა შესაძლოა 35 მილიონ ევრომდე გაიზარდოს.

მარტინესი, რომელმაც ასტონ ვილასთან ახალი ხუთწლიანი კონტრაქტი 2024 წელს გააფორმა, გასულ ზაფხულსაც აქტიურად იყო დაკავშირებული კლუბიდან წასვლასთან.

მასთან მოლაპარაკებებს მანჩესტერ იუნაიტედი აწარმოებდა და სატრანსფერო ფანჯრის ბოლო ეტაპზე იჯარის შეთავაზებაც გააკეთა, თუმცა ვილამ წინადადება უარყო. საბოლოოდ, იუნაიტედმა როიალ ანტვერპენიდან სენე ლამენსი დაიმატა.

მიუხედავად ამისა, გასულ სეზონში მარტინესი კვლავ ასტონ ვილას ერთ-ერთი საკვანძო ფიგურა იყო. მან 44 მატჩი ჩაატარა, უნაი ემერის გუნდმა კი პრემიერ ლიგაში მე-4 ადგილი დაიკავა და ევროპა ლიგა მოიგო.

შედეგად, ასტონ ვილა მომავალ სეზონში ჩემპიონთა ლიგაზე იასპარეზებს, ხოლო იუვენტუსი, რომელმაც სერია A-ში მე-6 ადგილი დაიკავა, ევროპა ლიგაზე ითამაშებს.

მარტინესი მნიშვნელოვანი ფიგურა იყო არგენტინის ნაკრებისთვის ამ ზაფხულის მსოფლიო ჩემპიონატზეც. მან თავისი ქვეყნის რვავე შეხვედრა ძირითად შემადგენლობაში დაიწყო, არგენტინა კი ფინალში ესპანეთთან 0:1 დამარცხდა.

2020 წლის სექტემბერში არსენალიდან გადასვლის შემდეგ მარტინესმა ასტონ ვილას მაისურით 256 მატჩი ჩაატარა. მისი შესაძლო წასვლა კლუბში მიმდინარე მნიშვნელოვანი ცვლილებების კიდევ ერთი ნაწილი იქნებოდა, ამ ზაფხულს გუნდი უკვე დატოვეს მორგან როჯერსმა, იური ტილემანსმა და ლუკა დინმა.