რედ ბულის ხელმძღვანელობა მედიაში გავრცელებულ ინფორმაციას გამოეხმაურა, რომელიც გლობალური ფეხბურთის მიმართულების ხელმძღვანელის პოსტიდან იურგენ კლოპის შესაძლო დათხოვნას ეხებოდა.
კომპანიაში დაადასტურეს, რომ ეს ხმები სიმართლეს არ შეესაბამება.
კორპორაციული პროექტებისა და ინვესტიციების გენერალურმა დირექტორმა, ოლივერ მინცლაფმა, გერმანელი სპეციალისტის სავარაუდო გადადგომის შესახებ ვარაუდები მკაცრად უარყო:
„ეს სრული სისულელე და აბსოლუტურად უსაფუძვლო ბრალდებებია. პირიქით, ჩვენ ძალიან კმაყოფილები ვართ იურგენ კლოპის მუშაობით“.
იურგენ კლოპი ამ თანამდებობას 2025 წლის იანვრიდან იკავებს და კურირებს ლაიპციგის, ზალცბურგისა და ნიუ-იორკ რედ ბულზის მუშაობას. ამჟამად ავსტრიული კლუბი ჩემპიონატის სატურნირო ცხრილს ლიდერობს, ოლე ვერნერის ხელმძღვანელობით მოასპარეზე ლაიპციგი ბუნდესლიგაში მეხუთე ადგილზეა, ხოლო ამერიკულმა ფრენჩაიზმა გასულ სეზონში, ბოლო 15 წლის განმავლობაში პირველად, MLS-ის პლეი-ოფში გასვლა ვერ მოახერხა.
ლივერპულიდან 2024 წლის ზაფხულში წასვლის შემდეგ, კლოპი რედ ბულის სტრუქტურას შეუერთდა, თუმცა მედიაში პერიოდულად მაინც ჩნდება ხმები მისი სამწვრთნელო საქმიანობაში შესაძლო დაბრუნების შესახებ.
