ფორმულა 1-ში უილიამსის გუნდმა განცხადება გაავრცელა.
"Atlassian Williams F1 გუნდმა მიიღო გადაწყვეტილება, რომ FW48 პროგრამის შეფერხებების გამო, არ მიიღოს მონაწილეობა მომავალი კვირის ტესტში ბარსელონაში. ჩვენ ვაგრძელებთ მუშაობას ბოლიდის მაქსიმალური პერფორმანსის მისაღწევად.
ამის ნაცვლად, გუნდი მომავალი კვირის განმავლობაში ჩაატარებს ტესტების სერიას, მათ შორის VTT პროგრამას 2026 წლის მანქანით, რათა მოემზადოს ბაჰრეინში დაგეგმილი პირველი ოფიციალური ტესტისთვის და სეზონის პირველი რბოლისთვის მელბურნში.
ჩვენ მოუთმენლად ველით ტრასაზე დაბრუნებას უახლოეს კვირებში და გვსურს მადლობა გადავუხადოთ ყველა ჩვენს გულშემატკივარს თქვენი უწყვეტი მხარდაჭერისთვის, 2026 წელს ერთად ბევრი საინტერესო რამ გველის." - წერია განცხადებაში.
ფორმულა 1-ის გუნდები 2026 წლის პირველ სატესტო ღონისძიებას ბარსელონაში 26–30 იანვარს ჩაატარებენ, სადაც სრულიად ახალი მანქანები პირველად გამოვლენ ტრასაზე.
ახალი რეგლამენტის შემოღება ნიშნავს, რომ 2026 წლის სეზონის დაწყებამდე სამი ცალკეული სატესტო სესიაა დაგეგმილი. პირველი დახურულ კარს მიღმა გამართული ტესტი იქნება ბარსელონაში 26–30 იანვარს, რასაც მოჰყვება ორი ტესტი ბაჰრეინში - 11–13 თებერვალს და 18–20 თებერვალს.
ამის შემდეგ გუნდებს ორი კვირა ექნებათ სეზონის პირველი ეტაპისთვის მოსამზადებლად, რომელიც მელბურნში 6–8 მარტს არის დაგეგმილი. სეზონის პირველი ვარჯიშები 6 მარტს გაიმართება, კვალიფიკაცია - 7 მარტს, ხოლო პირველი რბოლა - 8 მარტს.
