ფორმულა 1-ის ბაჰრეინისა და საუდის არაბეთის გრან-პრიები, რომლებიც აპრილში უნდა გამართულიყო, მოსალოდნელია ახლო აღმოსავლეთში მიმდინარე კონფლიქტის გამო გაუქმდეს, რის შედეგადაც 2026 წლის სეზონი 22 რბოლამდე შემცირდება.
ბაჰრეინის გრან პრი დაგეგმილი 10–12 აპრილს იყო, რის შემდეგაც ერთი კვირის შემდეგ, 17–19 აპრილს, გრან პრი საუდის არაბეთის ქალაქ ჯედაში უნდა გამართულიყო.
თუმცა ორივე ქვეყანა სპარსეთის ყურის იმ სახელმწიფოებს შორისაა, რომლებიც ირანის მიერ განხორციელებული დარტყმების სამიზნე გახდნენ.
უსაფრთხოება ფორმულა 1-ისა და FIA-სთვის უმთავრესი პრიორიტეტია და ბოლო დღეებში ახლო აღმოსავლეთში არსებული სიტუაცია არ გაუმჯობესებულა.
Sky Sports-ის ინფორმაციით, აპრილში დაგეგმილი ახლო აღმოსავლეთის რბოლები ოფიციალურად გაუქმდება და, სავარაუდოდ, არ ჩანაცვლდება ფორმულა 1-ის უკვე დატვირთულ მარტი–დეკემბრის კალენდარში, რაც ნიშნავს, რომ სეზონი 22 გრან-პრიმდე შემცირდება.
პორტუგალიის პორტიმაოსა და იტალიის იმოლას ტრასები შესაძლო შემცვლელებად განიხილებოდა, თუმცა აპრილისთვის ღონისძიებების ორგანიზებისთვის საკმარისი დრო არ იქნება.
აპრილში რბოლების არჩატარების გამო კალენდარში ხუთკვირიანი პაუზა გაჩნდება იაპონიის გრან-პრის, რომელიც 27–29 მარტს გაიმართება, და მაიამის გრან-პრის შორის, რომელიც 1–3 მაისსაა დაგეგმილი.
