საქართველოს ეროვნული საფეხბურთო ნაკრებისთვის უეფას ერთა ლიგის მიმდინარე გათამაშებაში უმნიშვნელოვანესი მიზანი მიუღწეველი აღმოჩნდა. გუნდმა უნგრეთის ნაკრებთან წააგო, რითაც B2 ჯგუფში პირველ ან მეორე ადგილზე გასვლისა და A ლიგაში დაწინაურების შანსს საბოლოოდ დაემშვიდობა.
მატჩის შემდეგ გამოქვეყნებული შეფასებებით ნათლად ჩანს უნგრელთა უპირატესობა, მასპინძელთა გუნდის საშუალო შეფასებამ 7.56 შეადგინა, მაშინ როცა საქართველოს ნაკრების მაჩვენებელი 6.89 იყო. განსაკუთრებით გამოსარჩევია უნგრელთა კაპიტნის, დომინიკ სობოსლაის გამოსვლა, რომელმაც მოედანზე უმაღლესი, 8.7 ქულა დაიმსახურა.
რაც შეეხებათ ქართველ ფეხბურთელებს, სასტარტო შემადგენლობიდან საუკეთესო მოთამაშედ ნიკა გაგნიძე დასახელდა, რომლის თამაშიც 7.5 ქულით შეფასდა. ტრადიციულად დამაჯერებელი იყო გიორგი მამარდაშვილიც, რომელმაც 7.3 ქულა მიიღო. შედარებით დადებითი შეფასებები დაიმსახურეს ანზორ მექვაბიშვილმა და გიორგი წიტაიშვილმაც, რომელთა ანგარიშზეც 7.0-7.0 ქულაა.
სამწუხაროდ, შეტევის ხაზმა და დაცვამ სათანადოდ ვერ იმუშავა. ძირითად შემადგენლობაში მყოფი გიორგი კვერნაძის თამაში საშუალო, 6.5 ქულით შეფასდა, ხოლო გიორგი მიქაუტაძემ 6.4 მიიღო. ყველაზე დაბალი, 6.1 ქულა კაპიტან ოთარ კაკაბაძეს დაეწერა. თამაშის სურათის შეცვლა ვერც ცვლილებაზე შემოსულმა მოთამაშეებმა შეძლეს - ზურიკო დავითაშვილმა და ირაკლი ეგოიანმა 6.6-6.6 ქულა მიიღეს, ბუდუ ზივზივაძემ 6.5, ხოლო ირაკლი აზაროვმა 6.3.
