უნგრეთის ნაკრებმა თბილისში საქართველოს წინააღმდეგ დაძაბულ ბრძოლაში 2:0 გაიმარჯვა და უეფას ერთა ლიგის B2 ჯგუფში მინიმუმ პლეი-ოფში მონაწილეობა გაინაღდა.
უნგრელები ორშაბათს, ბუდაპეშტში, ჩრდილოეთ ირლანდიას დაუპირისპირდებიან შეხვედრაში, რომელიც ჯგუფის გამარჯვებულის ვინაობას გადაწყვეტს.
საქართველოს ნაკრები, რომელსაც ტრავმის გამო პსჟ-ის ვარსკვლავი ხვიჩა კვარაცხელია აკლდა, მატჩს ერთა ლიგის მიმდინარე გათამაშებაში გატანილი გოლის გარეშე შეხვდა.
ქართველებს ბოლო 8 ოფიციალური შეხვედრიდან ექვსში არ ჰქონდათ გატანილი, თუმცა უნგრეთთან თამაში იმედისმომცემად დაიწყეს.
ანზორ მექვაბიშვილს სანაკრებო კარიერაში პირველი გოლის გატანის შესაძლებლობა ჰქონდა, მაგრამ მისი შორეული დარტყმა უნგრეთის მეკარე ბალაჟ ტოტმა მოიგერია. გიორგი წიტაიშვილის დარტყმა კი მეტოქის მცველებმა დაბლოკეს.
სტუმრები ანგარიშის გახსნასთან ახლოს იყვნენ. საქართველოს ნაკრების დაცვის ხაზში დაშვებული შეცდომის შემდეგ ბარნაბაშ ვარგას ახლო მანძილიდან დარტყმა მცველებმა დაბლოკეს.
პირველი ტაიმის მიწურულს ქართველ გულშემატკივრებს დიდი ხნის ნანატრი გოლის აღნიშვნის იმედი გაუჩნდათ, როდესაც ლუკა ლოჩოშვილმა ტექნიკური დარტყმით ბურთი მეტოქის კარში გაგზავნა. თუმცა გოლი არ ჩაითვალა, რადგან ქართველი მცველი თამაშგარე მდგომარეობაში იმყოფებოდა.
მეორე ტაიმი უნგრეთის ნაკრებმა აქტიურად დაიწყო. გიორგი მამარდაშვილს კვლავ მოუწია თამაშში ჩართვა, როდესაც მილან ვიტალიშის მოჭრილი დარტყმა მოიგერია.
მალევე მამარდაშვილმა კიდევ ერთხელ გამოავლინა თავისი ოსტატობა. როლანდ შალაის ჩაწოდების შემდეგ საბა გოგლიჩიძის მიერ მოგერიებული ბურთი საკუთარი კარის ზედა კუთხისკენ წავიდა, თუმცა ქართველმა მეკარემ შესანიშნავი რეაქციით ავტოგოლი თავიდან აიცილა.
იქმნებოდა შთაბეჭდილება, რომ უნგრეთის ნაკრების გოლი მხოლოდ დროის საკითხი იყო და ეს მომენტი 73-ე წუთზე დადგა.
დომინიკ სობოსლაის მიერ ახლო ძელთან მოწოდებულ კუთხურს როლანდ შალაი თავით გამოეხმაურა, ბურთი ლაშა დვალს მოხვდა და საქართველოს ნაკრების კარში აღმოჩნდა.
საქართველოს ნაკრები ანგარიშის გათანაბრებას შეეცადა, თუმცა მატჩის დასრულებამდე 5 წუთით ადრე უნგრელებმა კონტრშეტევაზე მეორე გოლი გაიტანეს.
დომინიკ სობოსლაიმ ხელსაყრელ პოზიციაში მყოფ ბარნაბაშ ვარგას უპასა, რომელმაც ბურთი კარში გადაგზავნა და უნგრეთის ნაკრებში ბოლო 9 მატჩში მე-9 გოლი გაიტანა.
საქართველოს ნაკრებს კი უკვე 9 მატჩია არ მოუგია და ჯგუფში ბოლო ადგილზე დასრულების საფრთხე სულ უფრო რეალური ხდება.
