"გამარჯვება გვჭირდება როგორც გუნდს, ასევე ქვეყანას" - ბექა გორგაძე მომავალ მატჩზე

14 ნოემბერი ქართული რაგბის ისტორიაში განსაკუთრებული თარიღი იქნება ბორჯღალოსნები თავის 37-წლიან ისტორიაში მე-300 ოფიციალურ შეხვედრას ჩაატარებენ.

მსოფლიო რაგბის ერთა თასის ფარგლებში, საქართველო ავჭალის სტადიონზე ტონგას უმასპინძლებს. მატჩი 18:00 საათზე დაიწყება.

თამაშის წინ გამართული კაპიტნის ვარჯიშის შემდეგ, ჟურნალისტებთან კომენტარი ეროვნული გუნდის ლიდერებმა, დავით ნინიაშვილმა და ბექა გორგაძემ გააკეთეს.

დავით ნინიაშვილის თქმით, გუნდი მაქსიმალურად მოტივირებულია:

თავდაჯერებულები ვართ და მოსაგებად გავდივართ. ვეცდებით, გამოვასწოროთ ის შეცდომები, რაც წინა, კანადასთან მატჩში დავუშვით. ვიცით, რომ ტონგა ფიზიკურად ძალიან ძლიერია და კონტაქტისას აქტიურობენ, მაგრამ ჩვენ ამისთვის მზად ვართ და საუკეთესო თამაშს ვაჩვენებთ

ბექა გორგაძემ კი გულშემატკივრების როლზე გაამახვილა ყურადღება:

ახლა გამარჯვება ყველას გვჭირდება. ტონგა ჩვენთვის ნაცნობი მეტოქეა და ზუსტად ვიცით, რა უნდა დავუპირისპიროთ. ველოდებით გულშემატკივრებს როგორც ხვალ, ისე შემდეგ შეხვედრაში, ამერიკასთან მიხეილ მესხზე

გთავაზობთ საქართველოს ნაკრების შემადგენლობას ტონგას წინააღმდეგ:

ხაზი: 15. დავით ნინიაშვილი, 14. აკაკი ტაბუცაძე, 13. გიორგი შველიძე, 12. თორნიკე კახოიძე, 11. დაჩი პაპუნაშვილი, 10. ლუკა მატკავა, 9. ვასილ ლობჟანიძე;

შერკინება: 1. გიორგი ახალაძე, 2. ვანო კარკაძე, 3. ბაჩუკი ჭუმბაძე, 4. გაგი მარგველაშვილი, 5. კოტე მიქაუტაძე, 6. ლუკა ივანიშვილი, 7. ბექა საღინაძე, 8. ბექა გორგაძე.

სათადარიგოები: 16. ვახტანგ ჯინჭარაძე, 17. ნიკა აბულაძე, 18. ბექა გიგაშვილი, 19. გიორგი ჯავახია, 20. მიხეილ შიოშვილი, 21. ბექა შვანგირაძე; 22. გელა აფრასიძე, 23. ლუკა ტაბატაძე.