ამერიკული სათხილამურო სპორტის სუპერვარსკვლავი ლინდსი ვონი მიუხედავად პარასკევს დაცემის შედეგად მუხლის წინა ჯვარედინი იოგის (ACL) სრულად გაწყვეტისა, 2026 წლის ზამთრის ოლიმპიურ თამაშებში მონაწილეობას მიიღებს.
ვონმა ცოტა ხნის წინ ინსტაგრამზე დაწერა, რომ მისი „ოლიმპიური ოცნება არ დასრულებულა“, ხოლო 41 წლის სპორტსმენის პრესკონფერენციაზე გაკეთებულმა განცხადებამ ამერიკელის გულშემატკივრებს შვება მოუტანა.
შვეიცარიაში, მსოფლიო თასის ეტაპზე, ვონმა დაშვების შემდეგ კონტროლი დაკარგა და უსაფრთხოების ბადეზე შეჯახებისას დაეცა. მედიკოსების დახმარების შემდეგ, 2010 წლის ოლიმპიურმა ჩემპიონმა შეძლო ნელა ჩასრიალებულიყო ფინიშამდე, თუმცა აშკარად დისკომფორტს განიცდიდა.
მოგვიანებით, როგორც სტანდარტული პროცედურაა შეჯიბრების დროს დაშავებული სპორტსმენებისთვის, იგი საავადმყოფოში დამატებითი გამოკვლევისთვის ვერტმფრენით გადაიყვანეს.
ის დილის სესიაში მესამე მოთხილამურე იყო, ვისაც ასეთი ინციდენტი მოუვიდა. საბოლოოდ, ცუდი ხილვადობის გამო, დღის დარჩენილი ჩასვლები გაუქმდა.
ვონმა პრესკონფერენციაზე გაამხილა, რომ მიუხედავად მარცხენა მუხლის სერიოზული დაზიანებისა, იმავე დღეს სათხილამუროდ გავიდა. მისი თქმით, მუხლი სტაბილურია, არ არის შეშუპებული და მუხლის სამაგრის გამოყენებით დარწმუნებულია, რომ კვირას ასპარეზობას შეძლებს.
ოლიმპიადა ერთადერთი რამ არის, რაზეც ვფიქრობ. ყოველდღიურად ჩემი მუხლი უკეთეს მდგომარეობაშია.
