"გოლი ჩემი პრიორიტეტი არასდროსაა, მთავარია, გუნდმა მოიგო" - დანელია აეკ-თან გამარჯვების შემდეგ

UEFA Youth League-ის საკვალიფიკაციო ეტაპის 1/2 ფინალში აეკ ლარნაკასთან, ორი მატჩის ჯამში 6:3, გამარჯვების შემდეგ, დინამო თბილისის ნახევარმცველმა რეზი დანელიამ Adjarabet Arena-სთან შეხვედრაზე ისაუბრა.

"მეტოქის ძლიერი და სუსტი მხარეები შესწავლილი გვქონდა, რაც სამწვრთნელო სტაფის დამსახურებაა. ფეხბურთელებმა კი ვეცადეთ, ჩვენი მაქსიმუმი გაგვეკეთებინა და, საბოლოოდ, ძალიან კარგი მატჩი გამოვიდა.

რაც შეეხება გოლის მომენტს, ვცდილობდი, ჰალიდისთვის სივრცე გამეთავისუფლებინა, თუმცა უცებ ისე მოხდა, ბურთი ჩემ წინ აღმოჩნდა და გავიტანე. ჩემთვის გოლი პრიორიტეტი არასდროსაა, მთავარია, გუნდმა მოიგო და შემდეგ ეტაპზე გავედით.

მომდევნო რაუნდში რომელი მეტოქეც არ უნდა შეგვხვდეს, ორივე ფიზიკურად ძლიერი გუნდია. ველოდებით მათი თამაშის შედეგს და ფინალისთვის მომზადებას ამის შემდეგ დავიწყებთ", - თქვა დანელიამ Adjarabet Arena-სთან.

18 წლის შემტევმა ნახევარმცველმა საკვალიფიკაციოს ოთხივე თამაშში შეასრულა საგოლე მოქმედება - ჟრინსკისთან თითო-თითო გოლი და ასისტი ჰქონდა, ხოლო აეკ ლარნაკას ორივე შეხვედრაში გაუტანა.

დინამო თბილისი საქართველოს ისტორიაში პირველი გუნდია, რომელმაც UEFA Youth League-ის ორი საკვალიფიკაციო ეტაპი გაიარა და შესარჩევის ფინალს ითამაშებს. დავით გელაშვილის გუნდი შეხვდება ბელარუსულ დინამო მინსკს, რომელმაც ლუდოგორეცს, სახლში 0:1 მარცხის შემდეგ, ბულგარეთში 2:0 მოუგო.

საკვალიფიკაციოს ეტაპის ფინალის პირველი მატჩი - 26 ნოემბერს, ხოლო განმეორებითი 10 დეკემბერს ჩატარდება.